Əfqanıstanda törədilən partlayış nəticəsində beş nəfər həlak olub
Bakı, 14 may, AZƏRTAC
Əfqanıstanın şərqində yerləşən Paktiya əyalətinin administrativ mərkəzində baş verən partlayış nəticəsində ən azı beş dinc sakin həlak olub, 19 nəfər isə yaralanıb.
AZƏRTAC 1TV telekanalına istinadla xəbər verir ki, ordu korpusu nümayəndəsinin məlumatına görə, yaralıların arasında beş hərbçi də var.
İnsident mayın 14-də səhər saatlarında Qardez şəhərində hərbi məhkəmənin yaxınlığında qeydə alınıb. Kamikadze minalanmış yük maşınını quruma aid olan binanın qapısı qarşısında partlatmağa çalışıb, lakin o güllələnib. Buna baxmayaraq, partlayıcı qurğu işə düşüb.
Taliban hərəkatının partlayışın məsuliyyətini öz üzərinə götürdüyü bildirilir.
Xatırladaq ki, mayın 12-də Əfqanıstanda iki terror hücumu nəticəsində onlarla insan həlak olub. Onlardan biri dəfn mərasimində baş verib. Terrorçu-kamikadzenin törətdiyi partlayışın məsuliyyətini İŞİD qruplaşması üzərinə götürüb. Bundan başqa Kabildə yerləşən xəstəxanalardan birinə də hücum təşkil edilib.
Bölmənin digər xəbərləri
