“Ekol Mühəndislik Xidmətləri” QSC-nin tabeçiliyindəki istehsalat sahələrində ekoloji monitorinq aparılmışdır
Bakı, 25 sentyabr (AZƏRTAC). Azərbaycan Respublikası Dövlət Neft Şirkətinin (ARDNŞ) “Ekol Mühəndislik Xidmətləri” Qapalı Səhmdar Cəmiyyətinin (QSC) kompleks qazma işləri tresti tərəfindən istehsalat sahələrində ekoloji monitorinq işləri aparılır.
AZƏRTAC xəbər verir ki, QSC-nin həyata keçirdiyi prioritet ekoloji layihələr Sabunçu rayonu ərazisindəki Bakı Olimpiya stadionunun tikintisi ilə əlaqədar ayrılmış ərazidən çirkab suların kənarlaşdırılması və “Bakı Ağ şəhər” layihəsi ərazisindəki neft emalı zavodlarının köhnə istehsalat sahələrində olan süni gölməçələrdən sənaye tullantı sularının təmizləyici qurğulara nəql edilməsidir.
Ötən dövr ərzində qeyd olunan layihə ərazilərindən 586 min 319 kubmetr çirkab suları kənarlaşdırılmış, 255 min 930 kubmetr sənaye tullantı suları isə nəql edilmişdir.
Neft sənayesi sahələrində neftlə çirklənmiş torpaqların təmizlənməsi layihələrini də icra edən QSC tərəfindən Heydər Əliyev adına Bakı neft emalı zavodunun və “Azərneftyağ” neft emalı zavodunun “Bakı Ağ şəhər” layihəsi ərazisində yerləşən istehsalat sahələrindən 670 min 288 kubmetr, Bakı neft emalı zavodunun 1-ci sexinin ərazisindən isə 22 min 665 tondan çox neftlə çirklənmiş torpaq daşınmışdır.
Bölmənin digər xəbərləri
