EKOLOGİYA VƏ TƏBİİ SƏRVƏTLƏR NAZİRLİYİ ƏHALİNİ YANĞIN TƏHLÜKƏSİZLİYİ QAYDALARINA RİAYƏT ETMƏYƏ ÇAĞIRIR

16.08.2010 [19:56]
Çap et
A⁺ A^-

Bakı, 16 avqust (AZƏRTAC). Ekologiya və Təbii Sərvətlər Nazirliyindən (ETSN) AZƏRTAC-a verilən məlumata görə, avqustun 14-də saat 14:00 radələrində Astara rayonunun Hamuşam kəndi bələdiyyəsinin ərazisində torpaq mülkiyyətçisinin öz pay torpağında yanğın təhlükəsizliyi qaydalarına əməl etməməsi nəticəsində yanğın hadisəsi baş vermişdir. Yanğın sürətlə genişlənərək 1,5 hektar bələdiyyəyə məxsus ərazini əhatə etmişdir. Yanğın hadisəsi ETSN-in yerli qurumlarının əməkdaşlarının və yerli sakinlərin köməyi ilə operativ qaydada söndürülmüş və yanğının meşə fonduna keçməsinin qarşısı alınmışdır.

Həmçinin, həmin gün saat 13:00 radələrində Xızı rayonunun Sitalçay kəndinin ərazisindəki qış otlaq sahəsində də yanğın hadisəsi baş vermişdir. Baş vermiş yanğın sürətlə genişlənərək 100 hektarlarla ərazini əhatə etməklə həmin rayonun Dizəvər kəndi ətrafındakı yay otlaq sahələrinədək yayılmışdır. Yanğın avqustun 16-dək ETSN-in yerli qurumlarının əməkdaşlarının, FHN-in əsgərlərinin, Sumqayıt şəhər, Xızı, Quba, Şabran rayonlarının Yanğından Mühafizə Hissəsinin əməkdaşlarının, yerli sakinlərin köməyi ilə söndürülmüş və yanğının meşə fonduna keçməsinin qarşısı alınmışdır.

Ekologiya və Təbii Sərvətlər Nazirliyi əhalini bir daha odla ehtiyatlı olmağa, yanğın təhlükəsizliyi qaydalarına riayət etməyə çağırır.