Ekologiya və Təbii Sərvətlər Nazirliyinin əməkdaşları məktəblilərlə görüşmüşlər
Bakı, 23 aprel (AZƏRTAC). Ekologiya və Təbii Sərvətlər Nazirliyi (ETSN) yaşıllaşdırma və ətraf mühitin mühafizəsi ilə bağlı təbliğat işlərini davam etdirir.
Nazirlikdən AZƏRTAC-a bildirmişlər ki, Beynəlxalq Yer Günü ilə əlaqədar yerli meşə təsərrüfatlarında, həmçinin Sabunçu dairəsi və Zığ-Heydər Əliyev Beynəlxalq Aeroportu, Bakı-Quba, Bakı-Şamaxı, Ələt-Salyan və Ələt-Hacıqabul magistral avtomobil yollarının kənarında iməciliklər keçirilmişdir.
Azərbaycan Uşaq və Gənclərin Sülh Şəbəkəsinin Liderlik Məktəbinin 20-dən artıq üzvü Şirvan Milli Parkına səyahət etmiş və oranın biomüxtəlifliyi ilə yaxından tanış olmuşlar.
Nazirliyin mütəxəssisləri Bakı, Sumqayıt, Qazax, Tovuz, Xaçmaz, Qəbələ, İsmayıllı, Qax və Şəki məktəblərində şagirdlərlə söhbət aparmış, fotomüsabiqələr təşkil etmişlər. Həmin ərazilərdə yeni yaşıllıqlar salınmış, təmizlik və abadlıq işləri görülmüşdür.
Bölmənin digər xəbərləri
