“EKOLOJİ PARK”DA DAMCI ÜSULU İLƏ SUVARILMA TƏTBİQ EDİLİR
Bakı, 6 avqust (AZƏRTAC). Yaşıllaşdırma işləri həyata keçirilən zaman mühüm məsələlərdən biri bitkilərin suya olan tələbatının düzgün ödənilməsidir. Hər bitkinin suya tələbatı onun növündən, becərilmə şəraitindən asılı olaraq müəyyən edilir.
ARDNŞ-in mətbuat xidmətindən AZƏRTAC-a bildirmişlər ki, qurumun Ekologiya İdarəsi tərəfindən yaradılmış “Ekoloji Park”da damcı üsulu ilə suvarılmaya başlanılmış və yeni əkilmiş ağacların bu üsulla suvarılması müvəffəqiyyətlə həyata keçirilməkdədir. Mütəxəssislərin fikrincə, müasir yaşıllaşdırma işlərində tətbiq edilən suvarma üsulları içərisində Abşeron şəraiti üçün ən səmərəli olanı və iqtisadi cəhətdən ən sərfəlisi məhz damcı üsuludur. Bu yolla suvarma zamanı istifadə edilən su bitkinin kökünə daxil olaraq suya olan tələbatını ödəyir, beləliklə də bitkilər ifrat suvarmadan qorunur. Bu üsul istənilən relyef şəraitində tətbiq oluna bilir və bitkilərin məhsuldarlığının yüksəlməsinə səbəb olur. Damcı üsulunda sistemə daxil olan su filtrdən keçərək mexaniki qarışıqlardan və yosunlardan təmizlənməli, kolloidlərin qatılığı sudan az olmalıdır. Əks halda yüksək qatılıqlar damcılayıcı qurğuların tutulmasına və hətta sıradan çıxmasına səbəb ola bilər. Bunu nəzərə alan mütəxəssislər “Ekoloji Park”da suyun çirkli olduğu hallarda onu durultduqdan sonra istifadə edirlər.
Bölmənin digər xəbərləri
