Bakı, 22 sentyabr, AZƏRTAC

Sentyabrın 19-da başladılan və cəmi 24 saat davam edən lokal xarakterli antiterror tədbirləri iki istiqamət üzrə xüsusi diqqət çəkir. Birinci istiqamət odur ki, Azərbaycan lokal xarakterli antiterror tədbirlərin keçirilməsində məqsəd olaraq qarşıya qoyduğu bütün hədəflərinə çatdı. Tədbirlərin nəticəsi olaraq Xankəndində məskunlaşmış separatçı rejim ağ bayraq qaldıraraq təslim oldu. Onların hərbi arsenalı tamamilə dağıdılaraq məhv edildi. Azərbaycan Müdafiə Nazirliyinin verdiyi məlumatlardan görünür ki, separatçı rejim əlində olan bütün hərbi texnikanı antiterror tədbirlərinin gedişində itirib, salamat qalanlarını isə Ordumuza təhvil verməyə məcbur qalıb. Nəticə olaraq Qarabağın erməniəsilli sakinlərinin təmsilçiləri danışıqlar masasına oturmağa, dialoq qurmağa, Azərbaycan Konstitusiyasının şərtləri altında reinteqrasiya etməyə razılıq verdilər. Onlar Yevlax şəhərinə gəlməyə, Azərbaycanın rəsmi şəxsləri ilə görüşməyə, reinteqrasiya üçün irəli sürülən bütün şərtləri qəbul etməyə hazır olduqlarını bildirdilər. Azərbaycanın məğlub tərəf qarşısında şərtləri budur ki, Ermənistan silahlı qüvvələrinin Qarabağ bölgəsində yerləşən hissələri, həmçinin qondarma rejimin “özünümüdafiə qüvvələri” kimi təqdim edilən qeyri-qanuni hərbi dəstələr silahı yerə qoyurlar. Döyüş mövqelərindən və hərbi postlardan çıxaraq tam şəkildə tərk-silah olunurlar. Ermənistan silahlı qüvvələrinin Qarabağda olan birləşmələri Azərbaycan ərazilərini tərk edir, qeyri-qanuni erməni silahlı dəstələri buraxılır. Paralel şəkildə bütün silah-sursat və ağır texnika təhvil verilir. Bu o deməkdir ki, Qarabağdakı separatçı rejimin döyüş imkanları sıfra endirilib, fəaliyyəti imkansız olur. Artıq Qarabağdan “boz zona” kimi istifadə edilməsi qeyri-mümkündür. Bu kontekstdə yanaşsaq deyə bilərik ki, antiterror tədbirlərin nəticəsində qarşıya qoyulan məqsədlərə tam şəkildə nail olunub.

Bu sözləri AZƏRTAC-a açıqlmasında Mətbuat Şurasının İdarə Heyətinin üzvü, media eksperti Müşfiq Ələsgərli söyləyib.

Onun sözlərinə görə, iyirmi dörd saatlıq antiterror tədbirlərinin gedişatında diqqət çəkən ikinci mühüm məqam odur ki, bu proses minimum zərərlə yekunlaşdırılıb. Nəzərə almaq lazımdır ki, antiterror tədbirləri ağır relyefə malik olan dağlıq ərazilərdə gerçəkləşdirilib. Düşmən tərəfi uzun illər ərzində bu bölgədə böyük mühəndislik işləri aparıb, istehkamlar qurublar. Separatçı rejimin belə bir relyefdə istifadəsində olan 10 min nəfərlik hərbi arsenalı cəmi 24 saat ərzində təslim etdirmək, həm də prosesi minimum zərərlə yekunlaşdırmaq ciddi peşəkarlıq tələb edir. Azərbaycan Ordusu belə bir peşəkarlığı nümayiş etdirə bildi və 44 günlük Vətən müharibəsindən sonra dünyaya yeni bir örnəklər bəxş etdi.

“Qeyd etmək zəruridir ki, Azərbaycan Ordusunun peşəkarlığı həm də Qarabağda yaşayan erməniəsilli mülki əhali üçün faydalı oldu. Silahlı qüvvələrimiz yüksək dəqiqlikli silahlardan bacarıqla faydalanaraq, yalnız legitim hərbi obyektləri vurdular. Döyüş bölgəsinə yaxın məskunlaşmış mülki əhalinin sağlamlığını təmin etdilər. Ötən iki gün ərzində Ermənistan mediası Azərbaycan Ordusunun guya mülki əhaliyə də xəsarətlər yetirməsi barədə məqalələr paylaşır. Amma onlar öz iddialarını sübut etmək üçün bircə dənə fakt tapıb təqdim edə bilmirlər. Sübut üçün nə şəkillər, nə də videolentlər göstərmirlər. Onların belə yalan və yanlış davranışları dünya KİV-lərinin də diqqətini çəkib.

Antiterror tədbirlərinin yüksək peşəkarlıqla həyata keçirildiyini, öz hədəflərinə tamamilə çatdığını, prosesin həm ordumuz, həm də Qarabağda yaşayan mülki əhali üçün zərərsiz yekunlaşdığını nəzərə alıb demək olar ki, bu tədbirlərlə Azərbaycan dünyada yeni örnək yaratdı.