Ekspert: Laçın-Xankəndi yolunda nəzarət-buraxılış məntəqəsinin yaradılması növbəti siyasi qələbəmizin nümayişidir
Bakı, 26 aprel, AZƏRTAC
Aprelin 23-də Laçın-Xankəndi yolunda Azərbaycanın nəzarət-buraxılış məntəqəsi yaradıldı. Nəzarət-buraxılış məntəqəsinin yaradılması Azərbaycan Prezidenti İlham Əliyevin qətiyyətli və ardıcıl siyasətinin nəticəsi və təntənəsi olmaqla yanaşı, 44 günlük savaşdan sonra ən böyük qələbəmizdir.
Bunu AZƏRTAC-a açıqlamasında QHT sədri, internet-media eksperti Səbuhi Abbasov bildirib.
O qeyd edib ki, Prezident İlham Əliyevin sərt və barışmaz mövqeyi prosesə birbaşa təsir edib. Bu gün regionda baş verən proseslərdə Azərbaycan Prezidentinin yürütdüyü siyasət, güclü manevrlər beynəlxalq geosiyasi ekspertlərin araşdırma mövzusuna çevrilib.
Onun sözlərinə görə, nəzarət-buraxılış məntəqəsinin yaradılması iqtisadi və təhlükəsizlik məsələlərini nizama salacaq. Heç kimə sirr deyil ki, erməni terrorçu birləşmələri bu yolla silah-sursat, minaların daşınmasını həyata keçirirdilər. Bu da regionda sülh prosesinin ləngiməsinə, münasibətlərin gərginləşməsinə səbəb olurdu. Təbii ki, bu uğurun qazanılmasında ekoaktivistlərin, könüllü gənclərimizin rolunu xüsusi qiymətləndirməliyik.
Ekspert əlavə edib ki, regionda sülhün, əmin-amanlığın formalaşması üçün əlimizdən gələni etsək də, Ermənistan bütün mümkün yollardan, havadarlarından istifadə edərək prosesi ləngitməyə cəhd edir. Lakin heç bir təzyiq Prezident İlham Əliyevi öz qətiyyətli mövqeyindən geri döndərə bilmədi və bilməyəcək.
S.Abbasov bildirib ki, Azərbaycan öz haqqını tələb etməkdə davam etdi, hətta Azərbaycan Prezidenti Administrasiyası Qarabağ ermənilərinə reinteqrasiya və mövcud problemlərin həlli ilə bağlı müraciət edərək onların nümayəndələrini Bakıya dəvət etdi. Lakin Azərbaycanın bütün çağırışları cavabsız qaldı. Azərbaycan haqq yolundadır və bütün dünya bunu bilir, bəzi ölkələr qəbul etsə də, bəziləri “erməni sevdası”nın və lobbisinin təsiri altında həqiqətləri inkar etməyə çalışır.
Bölmənin digər xəbərləri
