DÜNYA
Ekvadora 40-a yaxın ölkə kömək təklif edib
![Ekvadora 40-a yaxın ölkə kömək təklif edib](/files/2024/1/1200x630/1705044963412641614_1200x630.jpg)
Bakı, 12 yanvar, AZƏRTAC
Ekvador hakimiyyəti həbsxana qiyamları səbəbindən baş verən iğtişaşlar fonunda 38 ölkədən yardım təklifi alıb.
AZƏRTAC xəbər verir ki, Ekvador Prezidenti Daniel Noboa bu barədə “FM Mundo” radiosuna müsahibəsində deyib. “Ekvador artıq 38 ölkədən yardım təklifi alıb. Biz hazırda Argentina və ABŞ-dan kömək qəbul etmişik”, - deyə Daniel Noboa bildirib.
Onun sözlərinə görə, Ekvador xarici ölkələrin dəstəyindən imtina edəcək vəziyyətdə deyil. Ölkə terrorizmlə “birbaşa müharibə” apardığından respublikanın kəşfiyyat məlumatlarına, artilleriyaya və digər vasitələrə ehtiyacı var.
Bir müddət öncə ABŞ Dövlət Departamenti Birləşmiş Ştatların hüquq-mühafizə orqanlarının cinayətlərin araşdırılmasında Ekvadora kömək göstərəcəyini, həmçinin təhlükəsizliyin təmin olunması üçün kəşfiyyat məlumatları təqdim edəcəyini elan edib.
Qeyd edək ki, yanvarın 7-də “Los Choneros” qruplaşmasının rəhbəri “Fito” ləqəbli lideri həbsxanadan qaçdıqdan sonra Ekvadorda təhlükəsizliklə bağlı vəziyyət daha da kəskinləşib. Bundan sonra bir neçə cəzaçəkmə müəssisəsində iğtişaşlar və girov götürmə halları baş verib. Yanvarın 8-də Ekvador Prezidenti ölkədə fövqəladə vəziyyət rejimi və komendant saatı elan edib. Dövlət başçısı bir gün sonra daxili silahlı münaqişənin mövcudluğunun tanınması haqqında fərman imzalayıb və 22 cinayətkar qrupun zərərsizləşdirilməsi barədə göstəriş verib.
Son məlumata görə, indiyədək azı 13 nəfər iğtişaşların qurbanı olub. Ekvador polisləri və hərbçiləri cinayətkar dəstələrin 329 üzvünü tutub, 5-ni isə məhv edib.