Bakı, 11 yanvar, AZƏRTAC

Güclülərin, qaliblərin ədalətli sülh gündəliyini təşviq etməsi, məğluba inkişafın, rifahın, təhlükəsiz birgəyaşayışın yolunu göstərməsi tarixdə nadir hallarda rast gəlinən bir hadisədir və bəlkə də bənzəri yoxdur.

Prezident İlham Əliyevin yerli telekanallara müsahibəsində səsləndirdiyi mesajlar və fikirlər bir daha sübuta yetirdi ki, dövlətimizin başçısı Azərbaycan-Ermənistan münasibətlərinin normallaşması, bölgədə davamlı sülhün və təhlükəsizliyin təmin olunması, regionun sabit inkişaf mərhələsinə qədəm qoyması ilə bağlı hər kəsdən, həmçinin Cənubi Qafqaz, eləcə də Asiya qitəsinin Mərkəzi Asiya və Yaxın Şərq subregionları, eyni zamanda, Şərqi Avropanın əhəmiyyətli bir hissəsi ilə bağlı subyektiv geosiyasi fərziyyələrini reallıq kimi təqdim etməyə çalışan qlobal mərkəzlərin strateqlərindən daha aydın təsəvvürlərə malikdir.

Bu fikirləri AZƏRTAC-a açıqlamasında siyasi ekspert Elçin Mirzəbəyli deyib.

Siyasi ekspertin sözlərinə görə, məhz bu aydın təsəvvürlərə söykənən baxış bucağı hadisələrin müxtəlif ssenarilər üzrə inkişafını ən incə detallarına kimi göz önünə gətirərək, sülhə qarşı çıxanlar üçün heç bir perspektivin olmadığını göstərir. Prezident İlham Əliyevin yerli telekanallara müsahibəsində səsləndirdiyi fikirlər bunun əksinə yönəlmiş cəhdlərin hansı nəticələrə yol açdığını dəqiq şəkildə ifadə edir.

Dövlətimizin başçısı diqqətə çatdırdı ki, bizim üçüncü müharibəni başlamaq fikrimiz yoxdur. Amma ölkəmiz üçün təhlükə olduğu təqdirdə, lazımi addımlar atılacaq. Prezident İlham Əliyev 2023-cü ildə İkinci Qarabağ müharibəsinin real sonu olacağına ümid etdiyini də dilə gətirdi.

“Bəli, Azərbaycanın ədalətli sülh gündəliyini təşviq edən, bölgə xalqlarının dinc birgəyaşayışını, qarşılıqlı faydalı əməkdaşlığını arzulayan, beynəlxalq hüququn norma və prinsiplərinə sonadək əməl edən, qlobal məsuliyyətini özündən dəfələrlə böyük ölkələrdən daha çox anlayan və bunu əməldə sərgiləyən bir dövlət kimi üçüncü müharibəyə başlamaq niyyəti yoxdur. Amma ölkəmizə qarşı hər hansı bir təxribat planlaşdıranlar, səbrimizi sınağa çəkmək istəyənlər bizim təklif etdiyimiz ədalətli sülhü daha ağır şərtlər altında qəbul etməyə məcbur olacaq və sonsuzadək xətalarının cəzasını çəkəcəklər.

Bu baxımdan sülh, etimada söykənən münasibətlər bölgədə uzunmüddətli sabitliyin, təhlükəsizliyin təmin edilməsində maraqlı olan bütün region dövlətlərinə, onların öz xalqlarının gələcəyini düşünən liderlərinə, siyasət adamlarına lazımdır. Sülh davamlı sabitliyin təmin olunması üçün başlıca amildir. Təbii resursları, rəqabətədavamlı sənayesi olmayan, beynəlxalq nəqliyyat və enerji dəhlizlərinin yan keçdiyi ölkələr üçün isə sabitlik həyati əhəmiyyət kəsb edir. Məhz bu baxımdan Ermənistanın sülhə bütün digər ölkələrdən daha çox ehtiyacı var, Təəssüf ki, bu ölkənin regiondankənar güclərin nüfuz müvəkkilliklərini icra edən liderləri, tarixi yalanların və zəhərli ultramillətçi ideyaların girovuna çevrilmiş, müasir dünyanın reallıqlarını dərk etməyi bacarmayan, özünün və bölgə xalqlarının potensialını düzgün dəyərləndirmək iqtidarında olmayan toplumu sülhün onlar üçün yeganə çıxış yolu olduğunu qəbul edə bilmir, yaxud qəbul etməyə özündə cəsarət tapmır. Xarici amillərlə yanaşı, sahib olduqları etnososial xarakterləri də buna mane olur”, - deyə E.Mirzəbəyli qeyd edib.

Siyasi ekspert Prezident İlham Əliyevin Azərbaycan telekanallarına müsahibəsində, əslində, sülh müqaviləsinin imzalanmamasının və qarşılıqlı münasibətlərdəki qeyri-müəyyənliyin Ermənistan üçün hansı fəsadlara səbəb ola biləcəyini bütün detalları ilə ifadə etdiyini bildirərək deyib: “Azərbaycan torpaqlarının 30 ilə yaxın işğal altında olduğu müddətdə, 1993-1994-cü illərdən başlayaraq dirçəlməyi, iqtisadi inkişafını təmin etməyi, beynəlxalq enerji və nəqliyyat dəhlizlərinin qlobal müstəvidə strateji əhəmiyyət kəsb edən, ayrılmaz bir parçasına çevrilməyi, nəhayət, müstəqil dövlət olmağı, öz ayaqları üzərində dayanmağı və irəliləməyi bacarıb. Yəni, torpaqlarının 20 faizi işğal altında olan bir ölkə bütün komponentləri, iqtisadi və hərbi potensialı ilə güclü bir dövlət oldu, amma xarici amillərin dolayısı və birbaşa iştirakı ilə Azərbaycan torpaqlarını işğal və talan edən, viran qoyan Ermənistan dövlət ola bilmədi. Əvvəllər Ermənistanı yalnız beynəlxalq donorların dəstəyi ilə mövcudluğunu qoruyub saxlayan, müxtəlif siyasi, hərbi, sosial proqramları gerçəkləşdirməyə çalışan qeyri-hökumət təşkilatına bənzədirdim. Amma Azərbaycanın vətəndaş cəmiyyəti institutlarının Şuşa-Xankəndi yolunda davam etməkdə olan etiraz aksiyasından sonra belə qərara gəldim ki, Ermənistan Cənubi Qafqazda həyata keçirilən bir layihədir və bu layihənin nə zamansa dövlətə çevrilməyinin yeganə yolu sülhdən keçir”.

Azərbaycanın öz enerji resurslarını dünya bazarına çıxışını təmin etdiyini diqqətə çatdıran siyasi ekspert bildirib ki, hazırda Avrasiyanın ən mühüm nəqliyyat dəhlizlərinin olduqca vacib, rəqabətədavamlı, iqtisadi baxımdan səmərəli marşrutları ölkəmizin ərazisindən keçir. Bu o deməkdir ki, Azərbaycanın bir dövlət olaraq inkişafı, gücünə güc qatması üçün bütün imkanları var və bu günədək görülən işlər elə bir fundament formalaşdırıb ki, bu təməlin üzərindən sonadək inkişaf etmək olar.

Elçin Mirzəbəyli, həmçinin deyib: “Cənubi Qafqaz və ətraf subregionların demoqrafik vəziyyəti də onu deməyə əsas verir ki, bir etnos olaraq, Avrasiyada əsas söz sahiblərindən biriyik. Ermənistan hər tərəfdən eyni soyun, dilin, mədəniyyətin daşıyıcısı olan, milli ruhu oyanmış, özünün intibah mərhələsini yaşayan, Azərbaycan Ordusunun böyük Qələbəsi ilə döyüş ruhu, özünəinamı yüksək səviyyədə olan, toparlanmış, təşkilatlanmış nəhəng bir etnosun əhatəsindədir. Biz gözləyə bilərik və bu gözləntini də əsaslandıran amil etnos olaraq humanist mahiyyətimizdən qaynaqlanır. Amma bu o demək deyil ki, “Ermənistan” adlı layihə öz oyunlarını sonsuzadək davam etdirəcək və biz bu “kvazidövlət”in yenidən toparlandırılaraq öz terrorçu-separatçı, qəsbkar siyasətini davam etdirməsinə imkan verəcəyik. Əlbəttə ki, yox. Ermənistanın ətrafındakı “çəmbər” getdikcə daralacaq, bu ölkənin daxili gündəliyini bizim atdığımız addımlar müəyyənləşdirəcək və bu addımlar Ermənistan üçün cavab verilməsi mümkün olmayan yeni-yeni çağırışlar yaradacaq. Bütün bunlar, şübhəsiz ki, 2025-ci ilə qədər nəzərə çarpması mümkün olan reallıqlardır”.

Siyasi ekspertin sözlərinə görə, 2025-ci ildən sonra təkcə Rusiya sülhməramlılarının Azərbaycan ərazilərindəki missiyasının müddəti deyil, həm də Ermənistana verilən vaxtın sonu çatacaq və artıq, bu ölkənin özünün də, sərgiləyəcəyi davranışlara adekvat olaraq, mövcudluğu günbəgün şübhə altına düşəcək. Bu baxımdan 2023-cü il Ermənistana Azərbaycanın beynəlxalq hüququn norma və prinsiplərinə uyğun olaraq irəli sürdüyü təkliflər əsasında sülh müqaviləsinə imza atması üçün həlledici zaman kəsiyidir.