Elçin Sultanov: Su-bataqlıq əraziləri biomüxtəliflik cəhətdən çox zəngindir
Bakı, 2 fevral, AZƏRTAC
“Ölkəmizdə beynəlxalq əhəmiyyətli iki böyük su-bataqlıq ərazisi mövcuddur. Bunlar Qızılağac və Ağgöl milli parklarıdır ki, həmin ərazilərdə çoxsaylı su-bataqlıq quşları qışlayır və yuvalayır. Ağgöl və Qızılağac milli parkları mühüm su-bataqlıq ərazisi kimi 2001-ci il mayın 25-də “Əsasən su quşlarının yaşama yerləri kimi beynəlxalq əhəmiyyəti olan su-bataqlıq yerlər haqqında” Ramsar Konvensiyasının “Ramsar siyahısı”na daxil edilib”.
Bunu Azərbaycan Ornitoloji Cəmiyyətinin direktoru, biologiya üzrə fəlsəfə doktoru Elçin Sultanov Ümumdünya Su-Bataqlıq Əraziləri Günü ilə əlaqədar AZƏRTAC-a açıqlamasında deyib.
E.Sultanov qeyd edib ki, su-bataqlıq əraziləri biomüxtəliflik cəhətdən çox zəngindir. Həmin ərazilər biomüxtəlifliyə, iqlimin yumşaldılmasına və iqlim dəyişikliyinə uyğunlaşmaya töhfə verən əhəmiyyətli ekosistemlərdir.
“Hazırda Ağgöl Milli Parkında alimlər, tələbələr və Bioloji Müxtəlifliyin Qorunması Xidmətinin əməkdaşları ilə bu günü qeyd edirik. Ağgöl mühüm su-bataqlıq ərazisi kimi miqrasiya edən quş növlərinin qışlama yeridir. Milli parkın ərazisi yalnız bataqlıqlar deyil, həmçinin tipik çöl və yarımsəhra landşaftlarından ibarətdir”, - deyə E.Sultanov bildirib.
Bölmənin digər xəbərləri
