ƏMƏK VƏ ƏHALİNİN SOSİAL MÜDAFİƏSİ NAZİRİ FÜZULİ ƏLƏKBƏROVUN ÇIXIŞI
- Ulu öndərimiz Heydər Əliyevin dediyi kimi, hamımızın məqsədi insanların rifah halını yaxşılaşdırmaq, gündəlik tələbatını ödəmək, onlara yaxşı həyat tərzi yaratmaqdan ibarətdir.
İqtisadiyyatımızın ilbəil gücləndiyi dövrdə işlərimiz artıq yeni müstəvidə, beynəlxalq təcrübəyə əsaslanmaqla gedir. İndiyədək görülmüş işlərin təhlili zamanı aşkar olunmuş mənfi halların, buraxılmış səhvlərin gələcək fəaliyyətimizdə təkrar edilməməsi üçün bir sıra tədbirlər həyata keçirilir. Məqsədimiz gələcək fəaliyyətimizdə yüksək nəticə əldə etməkdir.
Son zamanlar ölkəmizdə yeni iş yerlərinin açılması məşğulluq xidməti orqanlarının fəaliyyətinin təkmilləşdirilməsinə yeni istiqamət vermişdir. Sizin 2005-ci il 26 oktyabr tarixli Sərəncamınızla təsdiq olunmuş 2006-2015-ci illər üçün Azərbaycan Respublikasının məşğulluq strategiyasından irəli gələn vəzifələrin təmin edilməsi məqsədi ilə müvafiq Dövlət Proqramının layihəsi artıq hazırlanıb və yaxın vaxtlarda Nazirlər Kabinetinə təqdim olunacaqdır. Son üç ayda məşğulluq xidməti orqanlarının, nazirliyin digər strukturlarının fəaliyyətini araşdırarkən əldə etdiyimiz göstəriciləri diqqətinizə çatdırmaq istərdim.
Belə ki, son beş il ərzində işə götürənlərin müasir peşələr üzrə yüksək ixtisaslı kadrlara ehtiyaclarının artdığı şəraitdə peşə hazırlığına cəlb edilən işsiz vətəndaşların sayı 1,4 dəfə azalmışdır. İşsiz vətəndaşların işlə təmin edilməsi məqsədi ilə 1997-2003-cü illər ərzində 26,3 milyard manat vəsait ayrılmışdır. Bu vəsait hesabına nazirliyin məşğulluq xidməti orqanları nəzdində 103-ü kənd təsərrüfatı, 41-i sənayeyönümlü olmaqla, 144 müəssisə və təsərrüfat marketinq tədqiqatı aparılmadan və fəaliyyətləri əsaslandırılmadan yaradılmışdır. Nəticədə onlardan 70-i zərərlə işləyib, 18-i isə tamamilə fəaliyyətsiz olmuşdur. Ayrılan vəsaitin cəmi 20 faizi dövlətə qaytarılıb və yeni manatla 1 milyon manat məbləğində dövlət vəsaiti məqsədyönlü xərclənməyibdir. Hazırda araşdırmalar davam edir və müəssisələrin gələcək fəaliyyəti ilə bağlı müvafiq qərarlar veriləcəkdir.
Cənab Prezident, əldə edilmiş makroiqtisadi və sosial sabitlik əhalinin sosial müdafiəsi sistemində islahatlar strategiyasına özünəməxsus impuls vermişdir. Yeni islahatların istiqamətlərindən biri də ölkəmizdə ünvanlı dövlət sosial yardımı sisteminin tətbiqidir. Ünvanlı sosial yardımın səmərliliyi, ilk növbədə, məşğulluğun təmin edilməsi kimi fəal tədbirlərin görülməsindən asılıdır. Bu sistem bir sıra dövlətlərdə özünü doğrultmuşdur. Lakin ünvanlı sosial yardım sisteminin birtərəfli inkişaf etdirilməsi, islahatlar hesabına yalnız müavinətlərin məbləğinin artırılması əhalinin məşğulluq marağının zəifləməsinə gətirib çıxara bilər. Avropanın bir sıra aparıcı dövlətləri hazırda bu problemlə qarşılaşdığından, müavinətlərin məbləğini azaltmağa başlayıblar. Əvəzində isə, “işləməyi bacaran mütləq işlə təmin olunmalıdır” adlı proqrama əsasən yeni iş yerləri yaradılır.
Biz də fəaliyyətimizi siyasi-iqtisadi xəttimizə uyğun olaraq, məhz bu istiqamətdə inkişaf etdiririk. Bu siyasətin prioriteti insanları ələbaxımlığa öyrətmək yox, əksinə, işlə təmin etmək, digər tərəfdən, isə bəzi səbəblərdən minimum tələbatını ödəmək iqtidarında olmayan əhalinin yoxsulluqdan müdafiəsini gücləndirməkdir. Təbii ki, iş yerlərinin sayı artdıqca, ünvanlı dövlət sosial yardımına ehtiyacı olanların sayı azalacaq və yalnız bundan sonra mərhələlərlə müavinətlərin məbləğini artırmaq istiqamətində müəyyən addımlar atıla bilər.
Nazir ünvanlı dövlət sosial yardımı sisteminin tətbiqində, əmək münasibətlərinin tənzimlənməsində baş verən yeniliklərlə yanaşı, tibbi-sosial ekspertiza, əlillərin bərpa mərkəzlərinin fəaliyyəti, kadrların hazırlanmasında, maliyyə potensialından istifadədə yol verilmiş nöqsanların aradan qaldırılması istiqamətində görülən işlərdən də bəhs etdi.
X X X
Prezident İlham Əliyev iclasa yekun vurdu.
Bölmənin digər xəbərləri
