ƏMƏKDAŞLIĞIN GENİŞLƏNMƏSİNƏ MÜHÜM TÖHFƏ
AZƏRBAYCAN DÖVLƏTİ BAŞÇISININ ŞƏRƏFİNƏ
Ziyafət zamanı həmin gün keçirilən ikitərəfli danışıqlarda müzakirə olunmuş məsələlər barədə fikir mübadiləsi davam etdirildi.
Cənab Şirak Xəzərin Azərbaycan sektorundakı “Lənkəran-dəniz” “Talış-dəniz” neft yataqlarının birgə işlənməsi barədə Azərbaycan Dövlət Neft Şirkəti ilə Fransanın “Elf Akiten” və “Total” şirtkətləri arasında müqavilənin imzalanması mərasimində iştirak etdiyinə görə Prezident Heydər Əliyevə minnətdarlığını bildirdi. Fransanın ölkəmizlə əməkdaşlığa xüsusi maraq göstərdiyini bir daha vurğulayan Jak Şirak bir sıra şirkətlərin Azərbaycanda iş görmək üçün hazırladıqları konkret layihələrdən də bəhs etdi. O dedi ki, Fransa müstəqillik qazanmış Azərbaycanın iqtisadiyyatının dirçəldilməsində yaxından iştirak etmək istəyir və bunun üçün lazım olan bütün tədbirləri görəcəkdir. Ermənistan-Azərbaycan münaqişəsinin sülh yolu ilə aradan qaldırılmasında ATƏT-in Minsk qrupu çərçivəsində aparılan danışıqların vacib olduğunu nəzərə çarpdıran cənab Şirak dedi ki, Fransa münaqişənin həlli üçün öz səylərini daha da artıracaqdır.
Prezident Heydər Əliyevin Parisə rəsmi səfərinin ölkələrimiz arasında iqtisadiyyat, mədəniyyət və digər sahələrdə əməkdaşlığın inkişafında mühüm rol oynayacağını bildirən Fransa Prezidenti dedi ki, biz əlaqələrin möhkəmləndirilməsinə ürəkdən tərəfdarıq.
Ölkəmiz haqqında söylədiyi xoş sözlərə və Fransanın Azərbaycanla əlaqələrinin genişləndirilməsinə xüsusi diqqət yetirdiyinə görə Prezident Jak Şiraka minnətdarlığını bildirən Prezident Heydər Əliyev Avropanın bu nüfuzlu dövləti ilə əməkdaşlığın sıxlaşdırılmasına Azərbaycanın böyük əhəmiyyət verdiyini vurğuladı. Azərbaycan ilə Fransa arasındakı tarixi dostluq münasibətlərindən bəhs edən dövlətimizin başçısı respublikamızın dünya birliyi ilə bağlılığının daha da möhkəmləndiyini nəzərə çarpdırdı və Fransa şirkətlərinin geniş fəaliyyət göstərməsi üçün ölkəmizdə hər cür şərait olduğunu bildirdi.
Xəzərin Azərbaycan sektorundakı neft yataqlarının birgə işlənməsi barədə həmin gün ARDNŞ ilə “Elg Akiten” və “Total” şirkətləri arasında Yelisey sarayında imzalanmış müqavilənin ölkələrimizin münasibətlərinin daha da möhkəmləndirilməsində əsaslı rol oynayacağına əmin olduğunu bildirən respublikamızın rəhbəri daha sonra dedi ki, Ermənistan-Azərbaycan münaqişəsinin tezliklə həll edilməsi üçün Fransa nüfuzlu bir dövlət kimi öz səylərini artırmalıdır.
Ziyafət zamanı hər iki ölkəni maraqlandıran bir sıra digər məsələlər barədə də ətraflı fikir mübadiləsi aparıldı.
Daha sonra Prezident Heydər Əliyev 1944-cü ildə Fransa Respublikası müvəqqəti hökumətinin başçısı general Şarl de Qollun Sovet İttifaqına səfərindən söhbət açaraq dedi ki, o, həmin il noyabrın 27-də İrandan təyyarə ilə Bakıya gəlmiş, Azərbaycan xalqının nümayəndələri ilə görüşmüş və axşam dahi Azərbaycan bəstəkarı Üzeyir Hacıbəyovun “Koroğlu” operasına baxmışdır. General Şarl de Qoll noyabrın 28-də xüsusi qatarla Bakıdan Moskvaya yola düşmüşdür. Görkəmli dövlət xadimi Şarl de Qollun Sovet İttifaqına səfərindən və Bakıda olmasından geniş bəhs edən Prezident Heydər Əliyev dedi ki, Azərbaycanın müstəqillik əldə etdiyi, Fransa ilə dostluq əlaqələrimizin yarandığı və inkişaf etdiyi hazırkı dövrdə bu fakt xüsusi əhəmiyyət kəsb edir.
Sonra dövlətimizin başçısı Heydər Əliyev fransız xalqının dahi oğlunun xatirəsinə dərin ehtiram əlaməti olaraq general Şarl de Qollun 1944-cü ildə Bakıda olması barədə nadir kinoxronika lentinin surətini və videokaseti Fransa Respublikasına hədiyyə etdi və bu barədə yazdığı məktubu Prezident Jak Şiraka verdi.
Bölmənin digər xəbərləri
