Bakı, 10 sentyabr, AZƏRTAC

Moskva şəhərində Avrasiya Patent Təşkilatının (APT) İnzibati Şurasının 45-ci (31-ci növbəti) iclası öz işinə başlayıb. Tədbirdə inzibati Şuranın üzvləri, o cümlədən Azərbaycan, Belarus, Ermənistan, Qazaxıstan, Qırğızıstan, Rusiya, Tacikistan və Türkmənistanın milli patent ofislərinin rəhbərləri və digər məsul şəxsləri iştirak edirlər.

Bu barədə AZƏRTAC-a Əqli Mülkiyyət Agentliyindən məlumat verilib. Bildirilib ki, İnzibati Şuranın iclasında APT-nin icraçı orqanı olan Avrasiya Patent İdarəsinin (APİ) prezidenti Qriqori İvliyevin hesabatı dinlənilib. Hesabatda təşkilatın büdcə xərcləri, Avrasiya patentlərinin qüvvədə saxlanılması üçün ödənişlər, APT üzv-dövlətlərinin nümayəndələrinin ixtisasartırma və təhsil proqramlarında iştirakı və digər məsələlər barədə geniş məlumat verilib.

APT-nin 2025-ci il üçün büdcə layihəsi müzakirələrdən sonra qəbul edilib.

İclasda İnzibati Şuranın sədri vəzifəsinə seçkilər keçirilib. Azərbaycan Respublikası Əqli Mülkiyyət Agentliyinin İdarə Heyətinin sədri Kamran İmanov yekdilliklə APT İnzibati Şurasının sədri seçilib.

Tədbirə onlayn formatda qoşulan K.İmanov bu etimada görə təşəkkürünü bildirib. O, təşkilatın fəallığının gücləndirilməsi istiqamətində İnzibati Şura üzvlərinin potensialından daha səmərəli istifadə olunmasına çalışacağını və ümumi məqsədlər naminə Şuranın işinə yeni töhfələr verəcəyini bildirib.

Xatırladaq ki, İnzibati Şuranın iclası sentyabrın 9-da başlayıb və bu gün də işini davam etdirir.