ERKƏN YAŞLI UŞAQLARIN İNKİŞAFINA TEXNİKİ YARDIM LAYİHƏSİ ÜZRƏ TƏDBİRLƏR MÜZAKİRƏ EDİLMİŞDİR
Təhsil naziri Misir Mərdanov Asiya İnkişaf Bankının əməkdaşları Doran Bernard və xanım Riye Hiraoka ilə görüşmüşdür.
Təhsil Nazirliyindən AZƏRTAC-a bildirmişlər ki, görüşdə Azərbaycan Hökuməti ilə Asiya İnkişaf Bankı arasında imzalanmış sazişə əsasən, ölkəmizdə erkən yaşlı uşaqların inkişafına texniki yardım layihəsi üzrə 6 ay ərzində həyata keçiriləcək tədbirlər müzakirə olunmuşdur.
Görüşdə nazir Misir Mərdanov ölkəmizdə erkən yaşlı uşaqların məktəbəqədər təhsil müəssisələrinə cəlb olunması ilə bağlı mövcud problemlərdən danışmışdır. Bildirmişdir ki, hazırda respublikamızda 1800-ə qədər uşaq bağçası fəaliyyət göstərsə də, erkən yaşlı uşaqların yalnız 14-15 faizi bu müəssisələrə cəlb olunurlar.
Nazir yeni layihənin əsas məqsədinin 10 pilot rayonunda erkən yaşlı uşaqlarla bağlı problemlərin müəyyənləşdirilməsindən, real vəziyyətin öyrənilməsindən və s. ibarət olduğunu açıqlamışdır.
Texniki yardım layihəsinin həyata keçirilməsi üçün Təhsil, Səhiyyə, İqtisadi İnkişaf, Maliyyə nazirlikləri, Dövlət Statistika Komitəsi, həmin layihə üzrə seçilmiş rayon icra hakimiyyətləri, Asiya İnkişaf Bankı nümayəndələrindən, erkən yaşlı uşaqlarla iş aparan mütəxəssislərdən ibarət Əlaqələndirmə Şurasının yaradılması, təhsil, səhiyyə və iqtisadi inkişaf sahələrini əhatə edən işçi qruplarının təşkil olunması qərara alınmışdır.
Bölmənin digər xəbərləri
