ERMƏNİSTAN-AZƏRBAYCAN MÜNAQİŞƏSİ BEYNƏLXALQ HÜQUQUN PRİNSİPLƏRİ ƏSASINDA TEZLİKLƏ HƏLL EDİLMƏLİDİR
Həmin gün Azərbaycanın xarici işlər naziri Vilayət Quliyev ölkəmizdə səfərdə olan Avropa Şurası Parlament Assambleyası Siyasi Məsələlər Komitəsinin məruzəçisi Terri Devis ilə görüşmüşdür.
Görüş zamanı cənab Terri Devis regiona səfərinin Ermənistan-Azərbaycan münaqişəsinin həlli sahəsində işlərin vəziyyəti ilə tanışlıq məqsədi daşıdığını bildirmiş və Azərbaycanın bu problemin sülh yolu ilə həllinə tərəfdar olduğuna böyük əhəmiyyət verdiyini vurğulamışdır.
Nazir Vilayət Quliyev Ermənistan-Azərbaycan, Dağlıq Qarabağ münaqişəsi və onun həlli istiqamətində göstərilən səylər, ATƏT-in Minsk qrupunun bu sahədə fəaliyyəti barədə qonağa ətraflı məlumat vermiş, münaqişə nəticəsində öz torpaqlarından didərgin düşmüş 1 milyona yaxın azərbaycanlının ağır şəraitdə yaşadığını, erməni separatçı rejimi tərəfindən işğal edilmiş ərazilərdə Azərbaycanın mədəni sərvətlərinin, tarixi abidələrinin böyük hissəsinin məhv edildiyini, Dağlıq Qarabağın nəzarətsiz bölgə olduğunu və həmin ərazilərdən narkotik vasitələrin tranziti üçün istifadə edildiyini bildirmişdir. Nazir bu məsələlərin Azərbaycanın üzvü olduğu beynəlxalq təşkilatlarda, həmçinin Avropa Şurasında da dəfələrlə qaldırdığını xatırlatmışdır.
Ölkəmizin xarici siyasət idarəsinin başçısı Ermənistan-Azərbaycan, Dağlıq Qarabağ münaqişəsinin beynəlxalq hüququn prinsip və normaları əsasında tezliklə aradan qaldırılması üçün dünya birliyinin səylərinin artırılmasının vacibliyini vurğulamışdır.
Görüşdə qarşılıqlı maraq doğuran bir sıra digər məsələlər də müzakirə olunmuşdur.
Bölmənin digər xəbərləri
