Ermənistan tərəfi Arazdəyəndə zavodun inşası ilə bağlı Azərbaycanla danışıqlara hazır olduğunu bəyan edib
Bakı, 6 oktyabr, AZƏRTAC
Ermənistanın Azərbaycanın Naxçıvan Muxtar Respublikası ilə həmsərhəd ərazisində, Arazdəyən (Yerasx) qəsəbəsi yaxınlığında 16,500 kvadratmetr sahədə, illik istehsal gücü 108,000 ton olan iri metallurgiya zavodunun inşasının aparılması ilə bağlı bu ölkənin iqtisadiyyat naziri Vahan Kerobyan tərəfindən bu il iyunun 3-də sosial media hesabında məlumat və bu faktı təsdiqləyən videogörüntülər yayılıb.
Ermənistan 1991-ci il BMT-nin Avropa İqtisadi Komissiyasının “Transsərhəd kontekstdə Ətraf Mühitə Təsirin Qiymətləndirilməsi Konvensiyası”nın 3.1-ci bəndinə əsasən, sərhədyanı zonada tikiləcək metallurgiya zavodu barədə təsirə məruz qala biləcək ölkə kimi Azərbaycanı rəsmi xəbərdar etməyə və Konvensiyanın 5-ci bəndinə əsasən Azərbaycanla müvafiq məsləhətləşmələr aparmağa dair öhdəliklərə malikdir. Bu xüsusda qeyd edilməlidir ki, sözügedən fəaliyyət Konvensiyanın 1-ci əlavəsində transsərhəd təsiri gözlənilən fəaliyyətlərin siyahısına daxildir. Lakin Ermənistan tərəfindən mövcud olan kommunikasiya kanalları vasitəsilə Azərbaycana bu barədə hər hansı rəsmi bildiriş verilməyib və ölkəmizlə məsləhətləşmələrə başlanılmayıb.
AZƏRTAC xəbər verir ki, məlumat mətbuatda açıqlanan zaman Azərbaycan tərəfindən məsələyə operativ reaksiya verilib və Ermənistan tərəfinə məktub ünvanlanıb. Məktubda Ermənistandan Konvensiya üzrə öhdəliklərini yerinə yetirməsi, layihənin zərərli transsərhəd təsirlərini müəyyənləşdirmək məqsədilə məsləhətləşmələrə başlamaq üçün zəruri məlumatların təqdim olunması və zavodun tikintisinin həmin ərazidə dayandırılması tələb edilib.
Ermənistan tərəfinin cavab məktubunda Konvensiya üzrə öhdəlikləri pozulmadığı, sözügedən fəaliyyətin Azərbaycanın ətraf mühitinə əhəmiyyətli mənfi təsir etməyəcəyi bildirilib, Azərbaycanın məsləhətləşmələr aparmaq, sənədləri təqdim etmək və zavodun tikintisinin həmin ərazidə dayandırılması ilə bağlı tələbləri rədd edilib.
Bunu nəzərə alaraq, cari ilin sentyabrında Azərbaycan Konvensiyanın 3.7-ci maddəsinə və 4-cü Əlavəsinə əsasən məsələnin araşdırılması üçün BMT-nin Avropa İqtisadi Komissiyasının İcraçı katibinə müraciət ünvanlayıb. Müraciətdə Katiblikdən təcili olaraq zavodun transsərhəd təsirini müəyyənləşdirmək üçün təhqiqat komissiyasının yaradılması, ətraf mühitə təsir müəyyən olunanadək zavodun inşasının dərhal dayandırılması üçün Ermənistana müraciət ünvanlanması, ətraf mühitə təsirin qiymətləndirilməsi sənədi və mümkün təsirlərin azaldılması tədbirləri daxil olmaqla, inşaatla bağlı mümkün məlumatların əldə olunmasında Azərbaycana kömək göstərilməsi xahiş edilib. Müraciətin surəti Ermənistan tərəfinə də müvafiq qaydada çatdırılıb.
Bu il oktyabrın 13-də İcraçı katibin adından Azərbaycan tərəfinə cavab məktub ünvanlanıb. Məktubda Ermənistanın müzakirələr aparmağa, ətraf mühitə təsir və layihə sənədlərinin təqdim edilməsinə dair öhdəliklərinin olduğu təsdiqlənib.
Azərbaycanın BMT-nin Avropa İqtisadi Komissiyasının İcraçı katibinə müraciəti və Ermənistana qarşı davamlı hüquqi-diplomatik təzyiqləri nəticəsində bu il oktyabrın 31-də Ermənistanın iqtisadiyyat naziri zavodun inşasının (sərhəddən uzaq olan) yeni yerə keçirilməsi barədə mətbuata açıqlama verib. Eyni zamanda, Ermənistanın ətraf mühit naziri İcraçı katibə müraciət ünvanlayaraq Azərbaycanla danışıqlara hazır olduğunu bildirib.
Bölmənin digər xəbərləri
