Ermənistanda revanşist yanaşmaların davam etməsi sülh prosesinə inamı zəiflədir – ŞƏRH
Bakı, 17 sentyabr, AZƏRTAC
Ermənistan bəzi siyasətçilərin, ictimai fəalların və media nümayəndələrinin Qarabağa səfər edən diplomatik korpusun ünvanına yönəltdiyi reaksiyalar regionda formalaşan yeni reallıqlar fonunda diqqət çəkir. Diplomatik nümayəndələrin Azərbaycan ərazisində səfərlərinin siyasiləşdirilməsi və buna qarşı aqressiv ritorikanın səsləndirilməsi, ilk növbədə, Ermənistan cəmiyyətində Azərbaycanın Qarabağ bölgəsinə münasibətdə müəyyən stereotiplərin hələ də qorunduğunu göstərir.
Bu sözləri AZƏRTAC-a açıqlamasında Tural İsmayılov söyləyib.
O bildirib ki, Qarabağ və işğaldan azad edilmiş digər ərazilər Azərbaycanın beynəlxalq səviyyədə tanınmış ərazisidir. Bu baxımdan, həmin ərazilərdə dövlət tərəfindən müxtəlif tədbirlərin keçirilməsi, xarici diplomatların səfərlərinin təşkili və Azərbaycanın mədəni-tarixi irsinin beynəlxalq ictimaiyyətə təqdim edilməsi Azərbaycanın suveren hüquqları çərçivəsində həyata keçirilir.
"Xüsusilə diqqət çəkən məqam ondan ibarətdir ki, sülh prosesinin əsas məqsədlərindən biri Ermənistanın keçmiş münaqişənin yaratdığı qarşıdurma məntiqindən uzaqlaşmaqdır. Bunun üçün yalnız rəsmi sənədlərin imzalanması kifayət etmir. Cəmiyyətdə və mediada yeni reallıqların qəbul edilməsi, qarşı tərəfin ərazi bütövlüyünə və suverenliyinə hörmət edən yanaşmanın möhkəmlənməsi də vacibdir. Ermənistanda Qarabağa Şərqi Zəngəzura səfər edən diplomatlara qarşı səsləndirilən revanşist fikirlər bu baxımdan ziddiyyətli mesaj yaradır. Bir tərəfdən sülh gündəliyinə sadiqlik barədə siyasi bəyanatlar səsləndirilir, digər tərəfdən isə Azərbaycanın öz ərazisində həyata keçirdiyi fəaliyyətlərə qarşı etirazlar və təzyiq ritorikası müşahidə olunur.
Azərbaycan tərəfinin mövqeyi isə aydındır: Qarabağ Azərbaycanın suveren ərazisidir və bu ərazilərdə diplomatik səfərlərin, beynəlxalq tədbirlərin və mədəni layihələrin keçirilməsi bundan sonra da davam edə bilər. Hətta qarşıdakı mərhələdə bu səfərlərin və beynəlxalq təmasların genişlənməsi Azərbaycanın işğaldan azad edilmiş ərazilərinin regional və beynəlxalq gündəlikdə daha fəal yer almasına xidmət edəcək", - deyə T.İsmayılov vurğulayıb.
Politoloq əlavə edib ki, davamlı sülh yalnız siyasi sənədlərlə deyil, həm də düşüncə və ritorika dəyişikliyi ilə möhkəmlənir. Ermənistan siyasi və ictimai mühitində revanşist yanaşmaların davam etməsi sülh prosesinə inamı zəiflədən amillərdən biridir. Əgər Ermənistan həqiqətən uzunmüddətli sülh istəyirsə, bunun mühüm göstəricilərindən biri Azərbaycanın suverenliyinin və ərazi bütövlüyünün yalnız diplomatik masada deyil, siyasi ritorikada və ictimai diskursda da qəbul edilməsidir.
Bölmənin digər xəbərləri
