Bakı, 19 sentyabr, AZƏRTAC

Ermənistanın Gədəbəy istiqamətində təxribatları atəşkəsin pozulması coğrafiyasının genişləndiyini göstərir. Bu təxribatlar Ermənistanın sülh müqaviləsindən yayınmaq cəhdləridir. Onlar vəziyyəti gərginləşdirərək prosesə Cənubi Qafqazda maraqları olan dövlətləri cəlb edir. Lakin onlar Ali Baş Komandan İlham Əliyev və Azərbaycanın rəşadətli Ordusunun gücünü unutmamalıdırlar. Ordumuz yarana biləcək hər hansı təxribata adekvat cavab verməyə qadirdir. Bütün bunların hamısını bölgədə təxribat əmirini verən şəxslər və erməni xalqı da bilir.

Bunu ehtiyatda olan polkovnik, Qarabağ müharibəsi və Silahlı Qüvvələrin veteranı, hərbi ekspert Şair Ramaldanov AZƏRTAC-a müsahibəsində deyib. O qeyd edib ki, Azərbaycanla Ermənistan arasındakı şərti sərhəddə müəyyən eskalasiyalar gedir.

Ekspert Qarabağ bölgəsində də vəziyyətin gərgin olduğunu deyib: “Münasibətləri gərginləşdirmək istəyən Ermənistan rəhbərliyi və onun havadarları atəşkəsi daim pozmaqla Azərbaycanı müəyyən mənada təhrik etmək istəyir. Bu iki dövlət arasında gedən sülh danışıqlarına ciddi zərbə deməkdir. Əsas məsələ bundan ibarətdir ki, sərhəd boyu yaşayış məntəqələri və dinc əhalinin təhlükəsizliyi təmin olunmalıdır. Azərbaycan ermənilərə adekvat cavab versə də, bu qaydaya ciddi əməl edir və ermənilərin yaşayış məntəqələrinə qətiyyən atəş açmır. Hər hansı istiqamətdə Azərbaycan tərəfinin dinc əhalisinə, yaşayış məntəqələrinə qarşı təhlükə yaranarsa, adekvat addımlar atılacaq”.

Təxribatların törədilməsinin digər səbəbinin Ermənistan ordusunda vəziyyətin çətinləşməsi olduğunu vurğulayan Ş.Ramaldanov maddi vəziyyəti pisləşən hərbçilərin tərxis edilmək üçün raport yazdığını da qeyd edib: “Bu barədə Ermənistan ordusunun zabiti deyib ki, müqavilə əsasında xidmət edən əsgərlərin maddi vəziyyəti çox pisdir. Bu səbəbdən Ermənistan ordusunda müqaviləli hərbi qulluqçularla könüllülər arasında münasibətlər yaxşı deyil. Erməni xalqı ölkələrində hərbçilərin perspektivini görmürlər. Onlar hökumətlərinin və xarici dövlətlərin siyasətinin qurbanına çevrilirlər. Sərhəd yaxınlığında yığılan erməni qoşunundakı əsgər və zabitlər aqibətlərini bilirlər. Onlar 44 günlük Vətən müharibəsində Azərbaycan Ordusunun gücünə şahid olublar. Eyni zamanda, sosial problemlər, psixoloji faktorlar səbəbindən hərbçilər Ermənistan ordusunda vuruşmaq istəmirlər. Belə ki, onlar hərbidən tərxis olunub, başqa yerdə daha müstəqil yaşaya bilərlər. Əsas odur ki, digər dövlətlərin, öz hökumətlərinin maraqlarına qurban olmasınlar. Lakin düşmən ordusunda vuruşan insanlara qarşı ciddi məhdudiyyət qoyulub və onları buraxmır. Getmək istəyən şəxslər həbsə məhkum edilir. Bir neçə gün əvvəl Ermənistanda kütləvi həbslərin başladığı xəbərləri ictimaiyyətə çatdırıldı. Həmin şəxslər arasında Ermənistan Müdafiə Nazirliyinin keçmiş vəzifəli əməkdaşları da vardı. Bu isə ordu ilə Nikol Paşinyan arasındakı böyük baryerlərin olduğunu göstərir. Təcavüzkar ölkənin Baş naziri dövlətin bütün strukturlarına öz adamlarını yerləşdirmək istəyir. Əmrlərinə tabe olmayan adamlar isə müəyyən bəhanələrlə həbs olunur. Nikol Paşinyanın “dövləti təmizləmək” siyasəti son günlər daha da sürətlə davam edir. Ermənistan ordusunda yüksək vəzifəli Rusiyaya meyilli hərbçilər çoxdur. Hazırda isə həmin hərbçilərin təmizləməsi prosesi gedir”.