Ermənistanın Azərbaycan və region ölkələri ilə münasibətlərini tənzimləməkdən başqa yolu yoxdur ŞƏRH
Bakı, 13 sentyabr, AZƏRTAC
Ermənistanın son siyasi və hərbi addımları regionu təhdid edən xüsusiyyətlərlə müşahidə olunur. Bölgə dövlətlərinin maraqlarını nəzərə almadan həyata keçirilən istənilən fəaliyyət regional stabilliyə zərər vurmaqla yanaşı, təhlükəli tendensiyalara da yol açır. Belə ki, Ermənistan 2022-ci ilin oktyabr ayından Avropa İttifaqının (Aİ) müşahidə missiyasını Azərbaycanla şərti dövlət sərhədinə gətirərək, sonradan say tərkibini artırması, özünün təxribatlarını ört-basdır etməyə hesablanıb. Hazırda Kollektiv Təhlükəsizlik Müqaviləsi Təşkilatının (KTMT) üzvü olmasına baxmayaraq, Ermənistanın ABŞ ilə keçirilən təlimlərini Rusiya və İrana qarşı istiqamət almış siyasət kimi dəyərləndirmək olar. Bu ilin əvvəlindən Ermənistanın KTMT-nin təlimlərindən imtina etməsi, öz nümayəndəsini təşkilatdan geri çağıraraq rəsmi Moskvaya demarşı Rusiya hakim dairələri tərəfindən birmənalı qarşılanmır. Eyni zamanda, Rusiya Qafqazda gedən bütün prosesləri izləyir və ona qarşı istiqamətlənən məsələləri diqqətdə saxlayır.
Bu fikirləri AZƏRTAC-a açıqlamasında politoloq Tural Əliyev söyləyib.
Onun sözlərinə görə, Qərb Ermənistan üzərindən Rusiyanın geostrateji dayaqlarının zəiflədilməsi mexanizmlərini işə salıb. Rusiya Ermənistanın Qərblə münasibətlərinin artan xətlə inkişaf etməsini yaxından izləyir və prosesin hara getdiyini çox yaxşı bilir. Məlum olduğu kimi, Ermənistanda Rusiyanın hərbi bazası yerləşir, bu da İrəvanın bütövlükdə təhlükəsizlik və iqtisadi cəhətdən Moskvadan asılılığını göstərir. Nikol Paşinyanın İtaliya mətbuatına müsahibəsində Rusiyanın Ermənistanın 99 faiz təhlükəsizliyinə qarant olduğunu strateji səhv adlandırıb. Paralel olaraq, Ermənistanın baş nazirinin çıxışlarında Rusiya əleyhinə eyhamlar, narazılıqlar, parlament sədrinin Rusiya Xarici İşlər Nazirliyinin mətbuat xidmətinin rəhbərinə kobud ifadələrlə cavab verməsi təsadüfi gedişlər deyil. Ermənistan bir dövlət olaraq mövcudluğunu Rusiyaya borclu olsa da, ancaq düşünürlər ki, bu gün rəsmi Moskva tələblərə cavab vermir.
“N.Paşinyanın həyat yoldaşı Anna Akopyanın Kiyevə səfər etməsi Rusiya ilə Ermənistanın diplomatik münasibətlərinin gərginləşdiyinin bariz nümunəsidir. Ermənistan hakimiyyəti riskləri hesablamadan Qərbdən aldığı siqnallar nəticəsində avantürist addımlar atmaqla geosiyasi vəziyyəti daha da ağırlaşdırır. Əgər Ermənistan analogiyalar aparsa, prosesləri rasional şəkildə dərk etsə, indiki siyasətinin sonunu anlayar. Siyasi proseslərin təhlili zamanı regiona aidiyyətı olmayan dövlətlərin, hərbi blokların vədinə inanıb təhlükəli gedişlər edən ölkələrin durumu göz qabağındadır. Nikol Paşinyan hakimiyyətinin daha çox güvəndiyi dövlətlərdən biri də İran idi. Amma baş nazirin Ermənistanın sərhəd təxribatlarının ardınca İran Prezidentinə zəng etməsi və etdiklərinə haqq qazandırmaq cəhdi iflasa uğradı. İran Prezidenti Ermənistanı regionda öz maraqlarına zidd olaraq ABŞ-la münasibətlərini kəskin tənqid edib, sərhədlərinə yaxın hərbi ittifaqların, Aİ-nin silahlı missiyasının şübhəli monitorinqlər aparmasına etirazını bildirib. Bir daha Ermənistan siyasi rəhbərliyinə “3+3 “ formatına alternativ axtarmağın mənasız olduğu və bunun təhlükəsizliyə təhdid yaratdığı xatırladılıb”, - deyə T.Əliyev bildirib.
Politoloq deyib: “Ermənistan nəhayət anlamalıdır ki, Azərbaycan və region ölkələri ilə münasibətləri tənzimləməkdən başqa yolu yoxdur. Ona görə də sülh müqaviləsi imzalanmalı, kommunikasiyalar açmalı və bölgənin inkişafına çalışılmalıdır. Əks təqdirdə regionda süni siyasi və hərbi böhran yaratmaq istəyi Ermənistan üçün yaxşı heç nə vəd etmir. Ermənistan öz üzərinə götürdüyü öhdəlikləri yerinə yetirməklə bərabər, destruktiv fəaliyyətlərdən çəkinməlidir”.
Bölmənin digər xəbərləri
