Bakı, 13 iyun (AZƏRTAC). Ermənistan Azərbaycanın tarixi ərazilərini 20 ildən artıq bir müddətdə işğal altında saxlamaqla beynəlxalq hüquq normalarını kobudcasına pozur. İndi də işğal altındakı həmin nəzarətsiz ərazilərdə narkotik vasitələr yetişdirib satmaqla bütün dünyanı zəhərləyir.

AZƏRTAC-a müsahibəsində bu haqda danışan Tərxis Olunmuş Hərbçilərin Gəncləri Maarifləndirmə İctimai Birliyinin sədri Emin Həsənli demişdir ki, Ermənistanın törətdiyi cinayətlərin sayı-hesabı yoxdur: dövlət səviyyəsində terror, soyqırımı, qarət və qətllər, narkoticarət... Bu cinayətlərin başında Ermənistan hakimiyyətinin yüksək vəzifəli şəxslərinin - R.Koçaryan, S.Sarksiyan, S.Ohanyan və başqalarının dayandığı artıq heç kəs üçün sirr deyildir. Yəqin ki, beynəlxalq dairələr də bundan xəbərdardırlar. İstər-istəməz ortaya sual çıxır: bəs dünya birliyi, əlində bir çox təsir imkanları olan beynəlxalq qurumlar niyə gözləmə mövqeyi tuturlar?

Bu yanaşmanın kökündə yenə ikili standartların dayandığını qeyd edən Emin Həsənli vurğulamışdır ki, ermənilər Dağlıq Qarabağda və işğal altındakı digər ərazilərdə çirkin əməllərini bu gün də davam etdirirlər. Orada silah qaçaqmalçılığına, terrorçular hazırlayan xüsusi düşərgələrin mövcudluğuna, narkotik vasitələrin yetişdirilməsinə və qanunsuz dövriyyəsinə dair yetərincə dəlil-sübutlar var. Azərbaycanın Milli Təhlükəsizlik Nazirliyi bununla bağlı ictimaiyyətə geniş açıqlama vermiş və ortaya yeni faktlar qoymuşdur.

Dünya bunu görmürmü, eşitmirmi? Əgər görür və eşidirsə, niyə heç bir reaksiya yoxdur? Ortaya bu kimi və buna bənzər bir çox sualların çıxdığına diqqət yönəldən E.Həsənli daha sonra demişdir: Bütün bunlar beynəlxalq hüquq normalarına zidd əməllərdir. Buna baxmayaraq, Dağlıq Qarabağda narkotik maddələrin əkilib becərilməsi və bu ərazidən narkotik vasitələrin tranziti kimi istifadə olunması getdikcə daha geniş miqyas alır. Beynəlxalq təşkilatlar isə susur. Buna heç bir münasibət bildirmirlər.

Ermənilərin bəşəri cinayətləri bununla da bitmir. Qarabağda tarixi abidələr məhv edilir. Azərbaycanlı əsirlərin bədən orqanlarını kəsib götürür, hərraca çıxarırlar. Bunlar yolverilməzdir və qarşısı təcili olaraq alınmalıdır.

Bu gün Azərbaycan beynəlxalq miqyaslı bir çox mötəbər tədbirlərə ev sahibliyi edir, mədəniyyətlərarası və dinlərarası dialoqlar, idman yarışları keçirir. Ölkəmiz Avropanın enerji təhlükəsizliyinə, dünyada sülhün qorunmasına mühüm töhfələr verir. Ermənistan isə terrorçu yetişdirir, dünyaya ölüm ixrac edir, insanları narkotika ilə zəhərləyir. Beynəlxalq ictimaiyyət, nəhayət, öz sözünü deməlidir. Azərbaycan vətəndaşları olaraq dünya birliyindən bunu qətiyyətlə tələb edir və deyirik: Bu bəşəri cinayətlərə ikili standartlarla yanaşılması qəbuledilməzdir!