“EUPEC-AZƏRBAYCAN” BİRGƏ MÜƏSSİSƏSİNİN İCRAÇI DİREKTORU PİTER BLÜMENİN ÇIXIŞI
Xanımlar və cənablar!
Bizim “Eupec-Azərbaycan” birgə müəssisəsinin təntənəli açılışında belə yüksək vəzifəli şəxslərin iştirak etməsindən şərəf duyuruq. Böyük məmnunluq hissi ilə birgə müəssisəmizin və bp-Azərbaycan şirkətinin işçiləri adından bizim hörmətli qonaqlarımıza, sənaye təmsilçilərinə və mətbuat nümayəndələrinə xoş gəlmisiniz deyirəm. Onlardan xahiş edirəm ki, bu mühüm mərasimi bütün Bakı şəhərinə, gözəl Azərbaycan diyarına və beləliklə, bütün dünyaya yaysınlar.
“Eupec-Azərbycan” “Eupec Pipe Coatings” Almaniya və “Azpetrol Croup” şirkətləri arasında yaradılmış birgə müəssisədir. “Eupec” şirkətinin baş ofisi Almaniyada yerləşir. Bu şirkət Almaniyadan əlavə, dünyanın Fransa, İspaniya, Amerika Birləşmiş Ştatları, Hindistan, Braziliya kimi ölkələri ilə yanaşı, indi Azərbaycanda da boruların korroziyaya qarşı örtüklənməsi ilə məşğuldur. “Azpetrol” bizim yerli tərəfdaşımızdır və onun əlavə təqdimata ehtiyacı yoxdur. Bu çoxsahəli qrupda idarəçiliyi cavan, enerjili, düşüncəli menecerlər həyata keçirirlər. Onlar minlərlə azərbaycanlıya iş yerləri yaradırlar.
Bu gün Azərbaycanda investisiyalar üçün əlverişli və davamlı iqtisadi, siyasi sabitlik mövcud olmasaydı, bizim zavodun yaradılması da mümkün olmazdı. Əlverişli investisiya mühiti yaratdığına görə, Azərbaycan Respublikasının Prezidenti Zati-aliləri cənab Heydər Əliyevə öz minnətdarlığımızı bildiririk.
Bu gün əlverişli iş şəraiti və sərbəst fəaliyyət imkanlarının yaradılması, habelə idarə edilməsi Azərbaycanda həyata keçirilən iqtisadi siyasətin nəticəsidir.
Bugünkü biznes dünyasında birgə müəssisələrin yaradılması haqqında qərar qəbul etmək çox da asan deyildir. Bu, geniş işçi qüvvəsi, kompleks maliyyə, əlbəttə ki, digər potensial investisiya imkanları axtarıb tapmaq nəticəsində mümkün ola bilər. Burada belə bir zavodun yaradılması xarici investorların Prezident Heydər Əliyevin nəzarəti altında Azərbaycan Respublikasında həyata keçirilən iqtisadi siyasətə inamının göstəricisidir. Beynəlxalq müsabiqədə qalib gələrək, belə böyük və vacib müqavilənin Azərbaycan Beynəlxalq Əməliyyat Şirkəti tərəfindən bizim birgə müəssisəmizə verildiyinə görə öz razılığımızı bildiririk. Beləliklə, birgə müəssisənin yaradılması üçün hətta sərmayə ayrılmasından öncə nəinki Azərbaycana, həm də hər bir təsisçiyə ayrı-ayrılıqda yüksək etimad göstərilmiş oldu. Bu günə kimi təqdim olunan imkanlar sayəsində, bizim birgə müəssisə qarşıdakı üç il ərzində Xəzərdə bütün sualtı boru kəmərlərində korroziyaya qarşı beton vasitəsilə ağır örtükləmə işlərini yerinə yetirəcəkdir. Söhbət “Azəri-Çıraq-Günəşli” layihəsinin birinci və ikinci fazaları və “Şahdəniz” layihəsindən gedir. Zavod xaricdən gətiriləcək və diametri 48 düymə çatan, uzunluğu isə 10 - 12,5 metrədək olan boruları örtükləmək üçün nəzərdə tutulubdur. Müəssisənin örtükləmə gücü bir növbədə, təxminən 150 borudur. Qeyd edək ki, bu rəqəm korroziya və beton örtüklərinin qalınlığından asılıdır. Bütün çılpaq və korroziyaya qarşı örtüklənmiş boruların istehsal sahəsinə qaldırılması əməliyyatları vakuum avadanlığı ilə təchiz olunmuş kranlar vasitəsilə həyata keçirilir. Beton örtüyü olan boruların sahədə yığılması üçün hidravlik yayıcılardan istifadə edilir.
Xanımlar və cənablar!
Qarşınızdakı xeyli miqdarda boru ancaq istifadə etmək üçün nəzərdə tutulubdur. Gördüyünüz kimi uzunluğu 345 kilometrə yaxın olan, təxminən 28 min borunun örtüklənməsi, demək olar ki, başa çatıbdır. Siz istehsal və ofis binalarını, infrastrukturun tərkibində olan yolları, içməli və sənaye məqsədli su sistemlərini, propan qaz xəttini və yeni tikilmiş dəmir yolunu və limanı da görürsünüz. Təsəvvür edin, bir il bundan əvvəl bu sahə bom-boş bir ərazi idi.
Mən böyük dəstəklərinə görə bu mərasimdə dövlət orqanlarına və hökumətə təşəkkürümü bildirmək istərdim. Onların köməyi olmasaydı, biz bu zavodu Azərbaycan Beynəlxalq Əməliyyat Şirkəti ilə müqavilənin imzalanmasından sonra cəmi altı ay ərzində istifadəyə verə bilməzdik.
Bizim istehsalatı bilən mütəxəssislər təsdiqləyə bilərlər ki, bu zavod boru örtükləmə sənayesində istifadə olunan texnologiyaya görə, keyfiyyət və təhlükəsizlik baxımından dünyada ən müasir müəssisələrdəndir. İşçilərimizin ümumi sayı təxminən 350 nəfərdir. Bunun 90 faizi Azərbaycan vətəndaşlarıdır. Müəssisəyə ümumi kapital qoyuluşu 15 milyon ABŞ dollarından çox olmuşdur. Zavodun nəqliyyat, gəmiçilik, yemək təminatı, səhiyyə və sair bu kimi sahələrə məsrəflərini lazımınca qiymətləndirməmək qeyri-mümkündür. Bizim fəaliyyət dairəmiz neft sənayesi üçün boruların örtüklənməsi ilə məhdudlaşmır. Biz regionda istifadə olunan su, qaz kəmərlərinin örtüklənməsini də təklif edə bilərik.
Yekun olaraq demək istərdim ki, bizim məqsədimiz bu müəssisəni Xəzər regionunun boruörtükləmə mərkəzinə çevirməkdir.
Hörmətli cənab Baş nazir!
Cənablar!
Biz bu məqsədə ancaq sizin daimi diqqət və qayğınız nəticəsində, yaratdığınız sülh və siyasi sabitlik mühitində nail ola bilərik.
Mən şərəf hissi duyuram ki, indiyə kimi hər kəs bu işdə iştirak edib və gələcəkdə də iştirak edəcəkdir.
Cənab Baş nazir, xahiş edirəm bu hədiyyəni qəbul edəsiniz. Onun dərin mənası var. O, Sizə burada görülən işlərin sirrlərini açacaqdır. Həmin hədiyyə Sizə örtükləmənin strukturuna daha yaxından baxmağa imkan verəcəkdir.
X X X
(Müəssisənin icraçı direktoru Baş nazir İlham Əliyevə xatirə olaraq şüşə qabın içərisində örtüklənmiş rəmzi boru parçası təqdim etdi).
Bölmənin digər xəbərləri
