“F-Holding”in təsisçisi: Azərbaycan-Özbəkistan əməkdaşlığında iqtisadi potensial tam reallaşdırılmalıdır
Bakı, 25 avqust, AZƏRTAC
Azərbaycan və Özbəkistan arasında siyasi və humanitar əlaqələrlə yanaşı, iqtisadi əməkdaşlığın genişləndirilməsi xüsusi əhəmiyyət daşıyır. Prezident İlham Əliyevin Özbəkistana dövlət səfəri və səfər çərçivəsində əldə olunan razılaşmalar hər iki ölkə arasında münasibətlərin yeni iqtisadi imkanlar mərhələsinə keçdiyini göstərən mühüm hadisədir.
Bu sözləri "F-Holding"in təsisçisi, investor və iş adamı Fərid Mustafayev deyib.
O qeyd edib ki, Azərbaycan və Özbəkistan arasında mövcud olan siyasi etimad və qardaşlıq münasibətləri iqtisadi əməkdaşlığın daha da dərinləşdirilməsi üçün möhkəm zəmin yaradır. “Azərbaycan və Özbəkistan münasibətlərində siyasi dialoq artıq yüksək səviyyədədir. Bu siyasi iradənin iqtisadi nəticələrə çevrilməsi isə növbəti mərhələnin əsas hədəflərindən biri olmalıdır. Biz qarşılıqlı investisiyaların artırılması, yeni birgə müəssisələrin yaradılması, sənaye kooperasiyasının genişləndirilməsi və biznes dairələri arasında birbaşa əlaqələrin gücləndirilməsi üçün ciddi potensial görürük”, - deyə Fərid Mustafayev vurğulayıb.
İnvestorun fikrincə, Azərbaycanın və Özbəkistanın iqtisadiyyatları bir sıra istiqamətlərdə bir-birini tamamlayan imkanlara malikdir. Bu baxımdan qarşılıqlı investisiyaların təşviqi xüsusilə əhəmiyyətlidir. İki ölkənin iş adamları bir-birinin bazarını daha yaxından tanımalı, birgə investisiya layihələri üzərində işləməli və uzunmüddətli biznes tərəfdaşlıqları qurmalıdırlar. Dövlətlər arasında yaradılmış siyasi və hüquqi mühit biznes üçün yeni imkanlar açır. İndi əsas məsələ həmin imkanlardan səmərəli istifadə etməkdir.
“Azərbaycan şirkətlərinin Özbəkistanda, Özbəkistan şirkətlərinin isə Azərbaycanda fəaliyyətinin genişlənməsi qarşılıqlı iqtisadi əlaqələrin əsas istiqamətlərindən birinə çevrilə bilər. Xüsusilə sənaye, tikinti, kənd təsərrüfatı, logistika, nəqliyyat, enerji, turizm, rəqəmsal texnologiyalar və xidmət sektorunda birgə layihələrin həyata keçirilməsi üçün geniş imkanlar mövcuddur. Bu gün investor üçün əsas məsələ bazarın ölçüsü ilə yanaşı, həmin bazarın regional imkanlarıdır. Azərbaycan və Özbəkistan bu baxımdan bir-birinə mühüm üstünlüklər təqdim edir. Azərbaycanın Cənubi Qafqazda, Özbəkistanın isə Mərkəzi Asiyada yerləşməsi iki ölkənin biznes subyektlərinə daha geniş regional bazarlara çıxış üçün imkan yaradır”, - deyə investor vurğulayıb.
O, nəqliyyat və logistika sahələrində əməkdaşlığın Azərbaycan-Özbəkistan iqtisadi münasibətlərinin ən perspektivli istiqamətlərindən biri olduğunu deyərək bildirib: “Orta Dəhlizin inkişafı Azərbaycan və Mərkəzi Asiya ölkələri arasında iqtisadi əlaqələrin daha da intensivləşməsinə şərait yaradır. Azərbaycanın nəqliyyat-logistika imkanları ilə Özbəkistanın Mərkəzi Asiyanın mühüm iqtisadi mərkəzlərindən biri olması bir-birini tamamlayır. Bu imkanlardan düzgün istifadə etməklə iki ölkə arasında ticarət dövriyyəsini artırmaqla yanaşı, Azərbaycanı Mərkəzi Asiya, Özbəkistanı isə Qafqaz və Avropa bazarları ilə daha sıx bağlamaq mümkündür. Burada söhbət yalnız yük daşımalarından getmir. Yeni logistika mərkəzləri, anbar infrastrukturu, nəqliyyat xidmətləri və əlaqəli biznes sahələri üçün də böyük imkanlar yaranır”.
İş adamı, həmçinin Azərbaycan və Özbəkistan arasında iqtisadi əlaqələrin yalnız iki ölkənin bazarları ilə məhdudlaşmamalı olduğunu deyib: “İki ölkənin coğrafi və iqtisadi imkanları daha geniş regional əməkdaşlıq modelinin formalaşdırılmasına şərait yaradır. Azərbaycanın və Özbəkistanın iqtisadi potensialını birləşdirmək Türk dünyasının iqtisadi inteqrasiyası baxımından da mühüm nəticələr verə bilər. Biz gələcəkdə birgə investisiya fondlarının, ortaq istehsal layihələrinin, logistika və ticarət platformalarının yaradılması kimi daha böyük təşəbbüsləri də gündəmə gətirə bilərik. Eyni zamanda, mədəni və humanitar əlaqələr iqtisadi əməkdaşlığın davamlılığına müsbət təsir edir”.
“F-Holding”in təsisçisi hesab edir ki, Prezident İlham Əliyevin Özbəkistana səfəri zamanı aparılan müzakirələr və əldə olunan razılaşmalar yaxın illərdə iqtisadi əlaqələrin daha da genişlənməsinə ciddi təkan verəcək. Bu səfər iqtisadi baxımdan çox mühüm mərhələ hesab edilir. Qarşıda böyük imkanlar var. Əsas məsələ siyasi səviyyədə əldə olunan razılaşmaları konkret investisiya layihələrinə, yeni istehsal müəssisələrinə, ticarət əlaqələrinə və biznes tərəfdaşlıqlarına çevirməkdir. Azərbaycanın və Özbəkistanın iqtisadi potensialı buna imkan yaradır. Həmçinin iki ölkə arasında iqtisadi münasibətlərin inkişafı həm Azərbaycan, həm də Özbəkistan biznesi üçün yeni bazarlar, yeni investisiya imkanları və yeni əməkdaşlıq formatları yaradacaq. Biz bu münasibətlərə sadəcə bu günün imkanları kimi yox, gələcək onilliklərin iqtisadi tərəfdaşlığı kimi baxmalıyıq. Azərbaycan və Özbəkistan arasında qardaşlıq münasibətləri artıq böyük iqtisadi layihələr üçün də güclü təmələ çevrilib.
Bölmənin digər xəbərləri
