Fransa hakimiyyəti miqrantlara qarşı dözülməz və zorakı münasibət sərgiləyir ŞƏRH
Bakı, 8 yanvar, AZƏRTAC
Prezident İlham Əliyev dünən yerli televiziyalara verdiyi müsahibədə haqlı olaraq Fransanın həyata keçirdiyi müstəmləkəçilik siyasətinə yer ayırıb. Qeyd etmək lazımdır ki, bu məsələ hazırda qlobal gündəmdə olan əsas problemlərdən biridir və bir çox dünya dövlətlərini narahat etməkdədir. Bakıda keçirilən COP29 tədbirində də Afrika ölkələrinin üzləşdiyi Fransa müstəmləkəçiliyi ilə bağlı problemə yer ayrıldı, çünki bu tədbirdə Afrika ölkələri geniş təmsil olunmuşdu. Son illər müxtəlif beynəlxalq platformalarda müstəmləkəçiliyə qarşı mübarizə daha geniş vüsət almağa başlayıb. Azərbaycan beynəlxalq miqyasda neokolonializmə son qoyulması üçün praktik işlər həyata keçirir, neokolonializmin istənilən formasına qarşı mübarizə aparır, bu istiqamətdə ictimai və vətəndaş hərəkatlarına dəstək göstərir. Uzun illər müstəmləkəçilikdən əziyyət çəkən bir ölkə olaraq Azərbaycan bu ağrını öz üzərində yaşamışdır, ona görə müstəmləkəçilikdən əziyyət çəkən xalqlar və ölkələr Azərbaycanı bu bəladan xilas olmaq üçün bir ümid və nicat yeri kimi görür. Fransanın əsarəti altında yaşayan ölkələrə nəzər salsaq, onların necə acınacaqlı vəziyyətdə, səfalət və yoxsulluq içində yaşadığının şahidi olarıq. Şübhəsiz ki, bunun əsas səbəbi Fransanın uzun illərdir yürütdüyü yarıtmaz sosial-iqtisadi siyasətlə bağlıdır.
Bu fikirləri AZƏRTAC-a açıqlamasında Azərbaycan-Amerika Gəncləri İctimai Birliyinin sədri Vüqar Əhmədov deyib.
V.Əhmədov qeyd edib ki, bu xalqlar və ölkələr öz hüquqlarını tələb etməyə başladığı halda böyük basqı ilə üzləşərək təqib olunurlar və həbs edilirlər, onların həyatlarına ciddi təhlükə yaranır. Bu xalqların və ölkələrin hüquqlarının qorunması hələ Azərbaycanın Qoşulmama Hərəkatına sədrliyi dövründən başlayıb. Azərbaycan Afrika qitəsinin və Qlobal Cənubun bir çox ölkələrinin müstəmləkəçilik dövrünün tarixi ilə yaxından tanış olub. Bu təmaslar sonradan digər beynəlxalq platformalarda da davam edib və bu faktlar tədricən imkan verib ki, Azərbaycan ictimaiyyəti də müasir dünyada hələ də mövcud olan müstəmləkəçilik halları ilə yaxından tanış olsun. Bu ölkələrin nümayəndələrinin iştirakı ilə Bakıda bir neçə beynəlxalq konfrans təşkil olunub. Bütün bunlar Azərbaycanı neokolonial ölkələr üçün bir beynəlxalq tribunaya çevirdi, Azərbaycan ictimaiyyətinə imkan yaratdı ki, bu xalqların yaşadığı ağrı və acılarla yaxından tanış olsun.
Fransanın müstəmləkəçilik siyasətinin artıq uzun illərdir ki, davam etdiyini vurğulayan V.Əhmədov deyib: “Fransa bu siyasətə son qoymaq əvəzinə son illər bunu daha da sərtləşdirib. Fransa hakimiyyəti miqrantlara qarşı dözülməz və zorakı münasibət sərgiləyir, artıq bunu Fransada yaşayan fransızlar da etiraf edirlər. Məhz buna görə artıq həm Fransada yaşayan və hüquqları pozulan xalqlar, həm də Fransadan minlərlə kilometr uzaqda yerləşən ölkələrdə xalq hərəkatı, etirazlar geniş vüsət alıb. Baxmayaraq ki, Fransa Azərbaycanı onların daxili işlərinə qarışdığını iddia edir, lakin bu həqiqətə uyğun deyil. Azərbaycan, sadəcə, bu xalqlara və hərəkata dəstək verir. Təəssüf ki, Qərbdə yerləşən bir sıra aparıcı beynəlxalq təşkilatlar insan haqları və digər mövzularda yüzlərlə beynəlxalq tədbirlər və görüşlər keçirsələr də, neokolonializm kimi vacib və aktual mövzuya toxunmur, bu mövzuda hər hansı yerli, yaxud beynəlxalq əhəmiyyətli tədbirlərin keçirilməsinin şahidi olmuruq. Məhz bu səbəbdən səsləri yaxşı eşidilməyən bu xalqlar daima alternativ platforma axtarışında olublar. İndi Fransa dövləti heç zaman olmadığı qədər illərdir haqlarını pozduğu müstəmləkəsi olan ölkələrdə yerli xalqların etiraz aksiyaları və nümayişləri ilə üzləşib, bunun qarşısını almaqda çox aciz görünür, məhz bu səbəbə görə öz dilində təhsil almaq kimi haqlı hüquqlarını tələb edən xalqların hüquq müdafiəçilərinə qarşı sərt tədbirlər görür, nümayişlərdə onlara güc tətbiq edir, onlar Fransa polisi tərəfindən vəhşicəsinə hücuma məruz qoyulur. Bütün bunlar şübhəsiz ki, dözülməzdir və bu etirazlar Fransa kimi dövlətin qarşısında ciddi bir çağırış sayıla bilər”.
Vüqar Əhmədovun sözlərinə görə, Azərbaycan həqiqət bildiyi maraqların müdafiəsində müstəqildir, hər bir ölkənin qlobal maraqları olduğu kimi, Azərbaycanın da qlobal maraqları vardır və bu qlobal maraqları həyata keçirmək aktiv xarici siyasətin yürüdülməsindən keçir. Bu prosesdə ictimai təşkilatlar, QHT-lər və media aktiv rol oynayır, ona görə də dövlətimizin başçısı QHT-lərin bu istiqamətdə bundan sonra da fəaliyyətini davam etdirməsinin vacibliyini vurğulayır. Bakı Təşəbbüs Qrupu bu istiqamətdə çox mühüm işlər həyata keçirir, artıq onların təşəbbüsü ilə biz bir sıra mühüm tədbirlərin şahidi olmuşuq. Neokolonializmə etiraz edən fəallar Parisdə və digər paytaxtlarda, Kaledoniya və digər ərazilərdə Azərbaycan bayrağını dalğalandıraraq səslərinin eşidilməsini tələb edirlər. Şübhəsiz ki, bu prosesdə ictimai təşkilatların və QHT-lərin rolu və fəaliyyəti çox önəmlidir və bu proses davamlı şəkildə aparılmalı, beynəlxalq platformalarda və təşkilatlarda gündəmə gətirilməlidir. Azərbaycan bu gün bu prosesdə beynəlxalq müstəvidə ən fəal iş aparan ölkələrdən biridir, ona görə ictimai təşkilatlar, QHT-lər də aktiv rol almağa çalışır.
Bölmənin digər xəbərləri
