Fransa portalı Azərbaycan multikulturalizmindən yazır
Paris, 17 iyul, AZƏRTAC
Fransanın siyasi, iqtisadi və geosiyasi sahələr üzrə ixtisaslaşmış Nlto.fr portalında “Azərbaycan - xalqlar arasında iradə birliyi aktoru” adlı məqalə dərc edilib.
AZƏRTAC xəbər verir ki, məqalədə Azərbaycanın mədəniyyətlər və dinlərarası dialoq sahəsində güclü ölkə olduğu diqqətə çatdırılıb.
Bakı Beynəlxalq Multikulturalizm Mərkəzinin fəaliyyətindən, ölkəmizdə müxtəlif etnik qrupların birgə, mehriban şəraitdə yaşamasından bəhs olunan məqalədə bildirilib ki, Azərbaycan mövcud multikultural modelini dünyada yayaraq multikulturalizmi təşviq edir. Ölkəmizdəki tolerantlıq mühitinə toxunulan yazıda Bakının Dünya Dini Liderlərinin Sammitinə ev sahibliyi etməsindən söz açılıb.
Məqalədə Azərbaycan Respublikasının Birinci vitse-prezidenti Mehriban Əliyevanın Vatikanda Papa Cəngavər Ordeninin ən ali dərəcəsinə - IX Piy Ordeninin Böyük Xaçına layiq görüldüyü diqqətə çatdırılır.
Bundan başqa, yazıda müstəqilliyinin ilk günlərindən Azərbaycanın erməni təcavüzünə məruz qaldığı da qeyd edilib.
Şəhla Ağalarova
AZƏRTAC-ın xüsusi müxbiri
Paris
Bölmənin digər xəbərləri
