FRANSANIN 12 ƏSGƏRİ OĞURLUQ ÜSTÜNDƏ HƏBS EDİLMİŞDİR

21.09.2004 [11:15]
Çap et
A⁺ A^-

AZƏRTAC-ın xüsusi müxbiri xəbər verir ki, ictimai asayişi və sülhü bərpa etmək məqsədi ilə Fil Dişi sahilinə göndərilmiş Fransa əsgərlərindən 12 nəfəri bankların birindən 100 min avro oğurladıqlarına görə həbs edilmişdir. Onlara ölkənin paytaxtı Abidcanın 450 kilometr şimal-qərbində yerləşən Man şəhərindəki Qərbi Afrika dövlətləri mərkəzi bankının keşiyini çəkmək həvələ olunmuşdu. Bank işçilərinin etimadını qazanan əsgərlər fürsətdən istifadə edərək, 100 min avro oğurlamış, lakin tezliklə Fransa polisi tərəfindən həbs edilmişlər.

Fransanın bu ölkədəki hərbi qüvvələri mətbuat xidmətinin başçısı polkovnik Anri Ossavi bildirmişdir ki, komandanlıq bu xoşagəlməz hadisənin digər əsgərlər arasında da yayılmaması üçün ciddi tədbirlər görür, nizam-intizamı daha da möhkəmləndirir.

Məsələ bundadır ki, bu, Fransa əsgərlərinin Fil Dişi sahilində törətdikləri ilk oğurluq hadisəsi deyildir. Elə bu ilin yanvarında Parisə gedən bir əsgərin çantasından külli miqdarda oğurluq pul tapılmışdı.

Xatırladaq ki, Fransanın 4 min əsgəri ölkənin üsyançıların nəzarəti altında olan şimali ilə prezidentə sadiq cənubu arasındakı əraziyə nəzarət edir.