Futzal millisinin baş məşqçisi: Bakıya qrup lideri kimi dönməyə çalışacağıq
Bakı, 15 yanvar, AZƏRTAC
Axsadığımız məqamlar, görəcəyimiz işlər çoxdur. Oyunlara qədər səhvlərimizi minimuma endirməliyik.
AZƏRTAC xəbər verir ki, bu sözləri 19 yaşadək futzalçılardan ibarət Azərbaycan millisinin baş məşqçisi İlqar Aslanov Avropa çempionatının ilkin mərhələsinə hazırlıqla bağlı federasiyanın rəsmi saytına açıqlamasında deyib.
Yığmanın yanvarın 10-dan toplanışda olduğunu söyləyən mütəxəssis məşqlərin plana uyğun şəkildə davam etdiyini diqqətə çatdırıb: “Gündə iki dəfə hazırlıq keçirik. Həm fiziki, həm də taktiki planda çalışmalar yerinə yetiririk. Yükləmələri daha çox topla çalışmalar zamanı veririk. Uşaqlar həvəslidirlər, çalışırlar dediklərimizi icra etsinlər. Çatışmazlıqların hamısını bir toplanışda aradan qaldırmaq mümkün olmasa da, müəyyən hissəsini düzəltməyə çalışırıq. Şənbə günü kubok oyununa çıxacağıq. Çalışırıq səfərə qədər daha bir matç keçirək. Həm də bu oyun kubok görüşünün ertəsi gün olsun. Çünki San-Marinoda 2 gün ərzində 2 oyun keçirəcəyik”.
Baş məşqçi Avropa çempionatının ilkin mərhələsindəki rəqibləri də dəyərləndirib: “Kosovo yığmasının oyununu görməmişik, ancaq şifahi də olsa, məlumatımız var. Fiziki baxımdan güclü rəqibdir, topla yaxşı oynayırlar. San-Marinonun isə bir neçə oyununa baxmışıq. Onlar ötən həftə beynəlxalq turnirdə iştirak ediblər. Müəyyən qədər informasiyamız var. Düzdür, hər 3 oyunda məğlub olublar, lakin bu zəif rəqibdir anlamına gəlmir. Ümumiyyətlə bu gün futzalda zəif komanda, rəqib anlayışı yoxdur. Üstəlik, San-Marino öz meydanında oynayacaq. Təqvimi də elə qurublar ki, onlar birinci oyundan sonra bir gün dincələcəklər. Amma Kosovo və biz ardıcıl 2 gün ərzində 2 oyun keçirəcəyik. Biz ora çatan gün San-Marino və Kosovo oyunu olacaq. Bu görüşü canlı izləməyi düşünürük”.
Təcrübəli çalışdırıcı komandanın qarşısına yaxşı nəticə qazanmaq tapşırığı qoyulduğunu da bildirib: “Biz də yaxşı hazırlaşırıq. Oyunlara qədər səhvlərimizi minimuma endirməliyik. Komandanın qarşısına yaxşı oynamaq və nəticə qazanmaq tapşırığı qoyulub. Çalışacağıq ki, Bakıya qrup lideri kimi dönək. Çünki növbəti mərhələyə ancaq qrup lideri olan komanda vəsiqə qazanacaq”.
Qeyd edək ki, Azərbaycan seçməsi Avropa çempionatının ilkin mərhələsi çərçivəsində yanvarın 25-də Kosovo, ertəsi gün San-Marino ilə qarşılaşacaq.
Bölmənin digər xəbərləri
