Füzulidə şəhidlərin xatirəsi anılıb, məzarları ziyarət olunub
Füzulidə şəhid Səid Rəşidzadə və şəhid Fərid Misirlinin anım günündə məzarları ziyarət olunub. Müqəddəs amal uğrunda şəhadətə ucalan şəhidlərin şərəfli həyatından bir daha söhbət açılıb.
AZƏRTAC-ın bölgə müxbiri xəbər verir ki, şəhidlərin anım mərasimində ailə üzvləri ilə bərabər rayon icra hakimiyyətinin əməkdaşları, Səfərbərlik və Hərbi Xidmətə Çağırış üzrə Dövlət Xidmətinin Füzuli rayon şöbəsinin nümayəndələri, təhsil və mədəniyyət işçiləri, şəhid ailələri, qazilər, kənd sakinləri və ziyalılar iştirak ediblər.
Rəşidzadə Səid Nofəl oğlu 1990-cı il yanvarın 28-də Horadiz şəhərində anadan olub. Orta məktəbi bitirdikdən sonra 2007-2011-ci illərdə Heydər Əliyev adına Azərbaycan Ali Hərbi Məktəbində təhsil alan Səid Rəşidzadə 2011-ci ildən Azərbaycan Silahlı Qüvvələrinin sıralarında xidmətə başlayıb. 2016-cı ilin Aprel döyüşlərində general Polad Həşimovla birgə düşmənə qarşı çiyin-çiyinə döyüşüb. Səid 2019-cu ildə səhhəti ilə bağlı ordudan tərxis olunsa da, 2020-ci il sentyabrın 27-də Vətən müharibəsi zamanı döyüşlərə könüllü yollanıb. İlk döyüş yolu Füzulidən başlayan Səid Rəşidzadə Hadruta qədər döyüşlərdə iştirak edib və şücaəti ilə seçilib. Oktyabrın 11-də Hadrut istiqamətində gedən döyüşlər zamanı şəhidlik zirvəsinə yüksəlib.
Azərbaycan Respublikasının Prezidenti İlham Əliyevin Sərəncamına əsasən Səid Rəşidzadə ölümündən sonra “Vətən uğrunda”, “İgidliyə görə”, “Xocavəndin azad olunmasına görə”, “Füzulinin azad olunmasına görə” medalları və 3-cü dərəcəli “Vətənə xidmətə görə” ordeni ilə təltif edilib.
***
Misirli Fərid Eldəniz oğlu 2001-ci il yanvarın 1-də Füzulidə anadan olub. 2019-cu il yanvarın 11-də həqiqi hərbi xidmətə yollanıb. 2020-ci ilin iyul ayında həqiqi hərbi xidmətini bitirib. 2020-ci il sentyabrın 1-də könüllü olaraq müddətdən artıq hərbi xidmətə başlayıb. Vətən müharibəsi zamanı Fərid Misirli Füzuli, Cəbrayıl döyüşlərində igidliklə iştirak edib. 2020-ci il oktyabrın 8-də Cəbrayıl istiqamətində qəhrəmancasına şəhidlik zirvəsinə yüksəlib.
Azərbaycan Respublikasının Prezidenti İlham Əliyevin Sərəncamına əsasən Fərid Misirli ölümündən sonra "Vətən uğrunda", "Cəbrayılın azad olunmasına görə", "Cəsur döyüşçü” medalları ilə təltif olunub.
Bölmənin digər xəbərləri
