GƏNC JURNALİSTLƏRİN MÜSABİQƏSİNƏ YEKUN VURULMUŞDUR
Gənclər, idman və turizm nazirinin müavini İntiqam Babayev tədbirdə çıxış edərək, müsabiqənin Azərbaycan gənclərinin IV Forumu çərçivəsində keçirildiyini bildirmişdir. Məqsəd kütləvi informasiya vasitələrində (KİV) çalışan gənc jurnalistlərin öz yaradıcılıq qabiliyyətlərini nümayiş etdirmələrinə şərait yaratmaq, istedadlı gənclərin üzə çıxarılmasını və həvəsləndirilməsini təmin etmək, iqtisadiyyat, sahibkarlıq, regionların sosial-iqtisadi inkişafı, sosial rifah və s. problemlərlə bağlı məsələlərin KİV-lərdə geniş işıqlandırılmasını stimullaşdırmaqdır.
O, müsabiqənin “Ümummilli lider Heydər Əliyev və Azərbaycanın iqtisadi inkişafı”, “Regionların sosial-iqtisadi inkişafı: nailiyyətlər və perspektivlər”, “Azərbaycan iqtisadiyyatı və qloballaşma”, “Turizmin inkişafı”, “Gənclərin sahibkarlıq və fermer fəaliyyəti” nominasiyaları üzrə keçirildiyini, müsabiqədə Bakı şəhəri, respublikamızın rayon və şəhərləri üzrə 24 KİV-də fəaliyyət göstərən 23 gənc jurnalistin 33 yazı təqdim etdiyini və qaliblərin müəyyənləşdirilməsi üçün müvafiq dövlət orqanlarının və yaradıcılıq təşkilatlarının nümayəndələrindən ibarət münsiflər heyətinin yaradıldığını diqqətə çatdırmışdır.
Digər çıxış edənlər bildirmişlər ki, regionlardakı mətbuat orqanlarının gənc nümayəndələrinin müsabiqədə daha yaxından iştirakına çalışmaq lazımdır.
Sonda qaliblərə mükafatlar təqdim edilmişdir.
