Gəncə ərazisində kimyəvi tullantılar nəticəsində yaranan göllərin yerində yaşıllıq salınacaqdır
Gəncə, 6 oktyabr (AZƏRTAC). Gəncədəki alüminium zavodu fəaliyyət göstərdiyi müddətdə ərazidə kimyəvi tullantılardan ibarət 3 nəhəng şlam gölü əmələ gəlmişdir. Əhalinin sağlamlığı üçün təhlükəli olan bu göllərin qurudulması məqsədi ilə artıq xeyli vaxtdır ki, tədbirlər görülür. Sahəsi 141 hektar olan göl ərazisinin torpaq qatı ilə örtülməsi üçün Gəncə gil-torpaq zavodu tərəfindən 17 maşın-mexanizm ayrılmışdır.
Zavodun direktoru Akif İbişov AZƏRTAC-a demişdir ki, hazırda texnika ilə yanaşı, ərazidə 100 nəfərdən artıq işçi qüvvəsi çalışır. Yaxın vaxtlarda əhalinin sağlamlığına mənfi təsir göstərən şlam göllərinin yerində yaşıllıq sahələri salınacaqdır. Azərbaycan Dövlət Aqrar Universitetinin alimləri də bu işə cəlb edilmişlər.
Direktor əlavə etmişdir ki, Gəncə alüminium zavodunun 47 illik fəaliyyəti dövründə burada üç göldə 21 milyon tona yaxın tullantı toplanmışdır.
Bölmənin digər xəbərləri
