Gəncədə içməli və tullantı su şəbəkələrinin inşası davam etdirilir
Bakı, 26 yanvar, AZƏRTAC
Azərbaycan Respublikasının Prezidenti İlham Əliyevin təsdiqlədiyi regionların sosial-iqtisadi inkişafı Dövlət Proqramı çərçivəsində Gəncə şəhərinin içməli və tullantı su infrastrukturlarının yenidən qurulması layihəsinin icrası davam etdirilir.
“Azərsu” ASC-nin İctimaiyyətlə əlaqələr şöbəsindən AZƏRTAC-a bildirilib ki, hazırda şəhərdə paylayıcı şəbəkələrin tikintisi və sayğaclaşma işləri həyata keçirilir. Cari ildə layihəsinin icrası çərçivəsində görüləcək işlər Gəncə Şəhər İcra Hakimiyyətində keçirilən tədbirdə ətraflı müzakirə edilib.
Gəncə Şəhər İcra Hakimiyyətinin başçısı Niyazi Bayramov qeyd edib ki, respublikanın ikinci böyük şəhəri olan bu şəhərin sosial-iqtisadi inkişafında içməli su və kanalizasiya infrastrukturunun yenidən qurulması mühüm əhəmiyyət kəsb edir. Ötən müddətdə yeni şəbəkələrin yaradıldığı ərazilərdə əhalinin içməli su təchizatı əhəmiyyətli dərəcədə yaxşılaşıb. Gəncədə içməli və tullantı su şəbəkələrinin tamamilə yenidən qurulması şəhərin sosial-iqtisadi inkişafına, əhalinin məişət şəraitinin yaxşılaşdırılmasına töhfələr verir.
“Azərsu” ASC-nin sədr müavini Etibar Məmmədov bildirib ki, Gəncə şəhərinin içməli və tullantı su infrastrukturlarının yenidən qurulması dövlət başçısının xüsusi diqqətindədir. Azərbaycan hökuməti və Almaniyanın KFW Bankının birgə maliyyələşdirdiyi “Açıq kommunal infrastruktur proqramı II” layihəsi çərçivəsində başlanılan işlər hazırda dövlət investisiyası hesabına davam etdirilir və cari ilin dövlət investisiya proqramında bu məqsədlə vəsait ayrılıb.
Layihənin təqdimatı zamanı bildirilib ki, Gəncə şəhərini dayanıqlı və keyfiyyətli içməli su ilə təmin etmək üçün Göygöl su mənbəyində məhsuldarlığı saniyədə 200 litr olan yeni drenaj sistemi yaradılıb. Gəncədə həcmi 4 min kubmetr olan su anbarı tikilib və mənbədən anbara qədər 24,3 kilometr uzunluğunda magistral su kəməri çəkilib. Eyni zamanda, Qızılqaya su mənbəyində bərpa-yenidənqurma işləri aparılıb, ümumi tutumu 12 min kubmetr olan 3 su anbarı, 11 kilometr magistral su xətləri inşa edilib. Gəncə şəhərinin içməli su tələbatının böyük hissəsi Şəmkirçay su anbarı hesabına təmin olunur. Su anbarının yaxınlığında məhsuldarlığı sutkada 140 min kubmetr olan sutəmizləyici qurğu və buradan Gəncə şəhərinə 27,5 kilometr Şəmkirçay-Gəncə magistral su kəməri inşa edilib.
Həmçinin Gəncə şəhərində 855 kilometr içməli, 813 kilometr tullantı su şəbəkəsinin yaradılması nəzərdə tutulur. İçməli və tullantı su şəbəkələrinin yenidən qurulması işləri mərhələli şəkildə həyata keçirilir. İndiyədək içməli su şəbəkəsinin 375 kilometrlik, tullantı su şəbəkəsini isə 330 kilometrlik hissəsi inşa edilib. Təsdiqlənmiş layihəyə uyğun olaraq 2023-cü ildə 16 kilometr içməli, 19 kilometr tullantı su xətləri və kollektorların inşası nəzərdə tutulur.
Layihəyə əsasən, Gəncədə yaranacaq tullantı sularının təmizlənib zərərsizləşdirilməsi üçün gələcəkdə Samux rayonu ərazisində məhsuldarlığı sutkada 110 min kubmetr olacaq təmizləyici qurğunun inşası da nəzərdə tutulur.
Bölmənin digər xəbərləri
