GƏNCLƏR, İDMAN VƏ TURİZM NAZİRİNİ MÜHÜM SƏFƏRLƏR GÖZLƏYİR
Milli Olimpiya Komitəsinin birinci vitse-prezidenti, gənclər, idman və turizm naziri Əbülfəz Qarayev Afinaya gedir. Nazirliyin mətbuat xidmətindən AZƏRTAC-ın müxbirinə bildirilmişdir ki, səfərin əsas məqsədi cari ilin yayında Yunanıstanın paytaxtında keçiriləcək XXVIII Olimpiya oyunlarında Azərbaycan yığma komandasının iştirakı ilə bağlı olan bir sıra təşkilati məsələlərin həllidir. Səfərin sonunda Əbülfəz Qarayev Bolqarıstanın gənclər və idman naziri Vasili İvanovun dəvəti ilə Sofiyaya gedəcəkdir. Bu ölkəyə səfər zamanı ikitərəfli əməkdaşlığın inkişafı məsələləri müzakirə ediləcəkdir.
Yanvarın 29-30-da Əbülfəz Qarayev Madriddə keçiriləcək birinci Dünya turizm sammitində də iştirak edəcəkdir. Dünya turizm təşkilatının təşkil etdiyi sammit turizm kommunikasiyalarının roluna həsr olunacaqdır. Tədbirdə bu beynəlxalq quruma üzv ölkələrdə turizmin inkişafı ilə məşğul olan dövlət idarələrinin başçıları iştirak edəcəklər.
Bölmənin digər xəbərləri
