Göz xəstəlikləri üzrə elmi-tədqiqat işləri dünyada akademik Zərifə Əliyevaya böyük şöhrət gətirib
Bakı, 28 aprel, AZƏRTAC
Aprelin 28-də Dövlət Sərhəd Xidmətində (DSX) görkəmli oftalmoloq, akademik Zərifə Əliyevanın anadan olmasının 100 illik yubileyinə həsr edilmiş tədbir keçirilib.
Qurumun mətbuat mərkəzindən AZƏRTAC-a bildiriblər ki, əvvəlcə DSX-nin qadın hərbi qulluqçuları Fəxri xiyabanda Zərifə Əliyevanın məzarını ziyarət edib və önünə gül dəstələri düzüblər.
Dövlət Sərhəd Xidmətində keçirilən tədbirdə dünyaşöhrətli alim Zərifə Əliyevanın həyat və fəaliyyətini əks etdirən fotosərgi nümayiş etdirilib. Həmçinin istedadlı alim, bacarıqlı pedaqoq, qayğıkeş ana olan Zərifə Əliyevanın həyat və fəaliyyəti barədə məlumat verilib.
Tədbirdə Milli Məclisin deputatları Ülviyyə Ağayeva və Sevil Mikayılova iştirak ediblər.
Keçirilən tədbirdə müstəqil Azərbaycan dövlətinin memarı və qurucusu Ümummilli Lider Heydər Əliyevin vəfalı ömür-gün yoldaşı, sədaqətli dostu və etibarlı silahdaşı olan Zərifə Əliyevanın elm üçün gözəl tədqiqatçı, övladlarına qayğıkeş valideyn olması qeyd edilib, onun keçdiyi həyat yolunun gənc xanımlarımızın formalaşması baxımından parlaq nümunə olması vurğulanıb.
Zərifə Əliyevanın oftalmologiyanın müxtəlif sahələri üzrə apardığı tədqiqatların, qazandığı nailiyyətlərin, yaratdığı fundamental əsərlərin Azərbaycan tibb elminin parlaq səhifələrini təşkil etməsi, 150-dən çox elmi əsərin, 10 monoqrafiyanın, göz xəstəlikləri üzrə elmi-tədqiqat işlərinin dünya oftalmologiya məkanında akademik Zərifə Əliyevaya böyük şöhrət gətirdiyi barədə məlumat verilib.
Sonda tədbir iştirakçılarına “İşığa aşıq ömür” sənədli filmi nümayiş etdirilib.
Bölmənin digər xəbərləri
