Gülşən Kəngərli: Azərbaycan ilə Özbəkistan arasında tələbə və elmi əməkdaş mübadiləsi uğurla aparılır
Bakı, 24 avqust, AZƏRTAC
Azərbaycan ilə Özbəkistan arasında əməkdaşlıq nəinki vacibdir, hətta zəruridir. Bu əməkdaşlıq bütün sahələri əhatə etməlidir.
Bunu Azərbaycan Milli Elmlər Akademiyasının Tarix İnstitutunun böyük elmi işçisi, azərbaycanəsilli sovet özbək yazıçısı, şairi, dramaturqu, ədəbiyyatşünası və dilçisi Maqsud Şeyxzadənin nəvəsi Gülşən Kəngərli AZƏRTAC-ın müxbirinə müsahibəsində deyib.
Azərbaycan-Özbəkistan əməkdaşlığının təhsil sahəsində inkişafından danışan müsahibimiz ölkələr arasında həm tələbələrin, həm də elmi əməkdaşların mübadiləsinin uğurla həyata keçirildiyini vurğulayıb.
“Bu, Türk dünyası ölkələrinin inkişafı və möhkəmlənməsində zəruri prosesdir. Çox sayda tələbə, – bu da Ümummilli Lider Heydər Əliyevin xidmətidir, – müxtəlif ölkələrin universitetlərində, o cümlədən Daşkənd Dövlət Universitetinin Tarix fakültəsində təhsil almaq üçün göndərilirdi. Bizim orada təhsil almış və alan əməkdaşlarımız da var. İnsanlar ünsiyyət qurduqları zaman dostlaşır və biri-birlərini tanıyırlar. Bunun üçün isə məhz birbaşa, canlı ünsiyyət lazımdır”, - deyə o qeyd edib.
Gülşən Kəngərlinin sözlərinə görə, əməkdaşlıq səviyyəsində başlayıb, dostluğa çevrilən əlaqələr çox qiymətlidir.
“Təsadüfi deyil ki, vaxtilə Ümummilli Lider Heydər Əliyev babam Maqsud Şeyxzadəni “İki xalqın – Azərbaycan və Özbəkistan xalqlarının oğlu” adlandırmışdı. Biri var dostluq əlaqələri, bir də var qardaşlıq əlaqələri. Azərbaycan-Özbəkistan əlaqələri baxımından bunu bütün həyatım boyu, xüsusilə də son illərdə konfranslar çərçivəsində Özbəkistana səfər etdiyim zaman görürəm. Bu gün yer üzündə dostluq etməyi bacarmağın nə demək olduğunu biz hamımız çox yaxşı başa düşürük”, - deyə o diqqətə çatdırıb.
Müəllif – Anara Axundova
Bölmənin digər xəbərləri
