Günay Əfəndiyeva: Regionun gələcəyi beynəlxalq hüquqa və suverenliyə hörmət prinsipləri ilə qurulmalıdır
Bakı, 17 sentyabr, AZƏRTAC
Azərbaycan artıq 6 ildir ki, Prezident İlham Əliyevin rəhbərliyi ilə işğaldan azad etdiyi, beynəlxalq hüququn norma və prinsipləri əsasında tanınan ərazisində yaradır, bərpa edir, gələcəyi formalaşdırır, sakinlərimiz “Böyük Qayıdış” Proqramı çərçivəsində öz doğma yurdlarına qayıdırlar. Qarabağ torpaqlarında aparılan irimiqyaslı işlər dövlətimiz tərəfindən mütəmadi şəkildə dünya ictimaiyyətinə təqdim olunur. Azərbaycanın ev sahibliyi etdiyi müxtəlif beynəlxalq səviyyəli tədbirlər zamanı, xarici ölkələrin dövlət rəsmiləri, media təmsilçiləri, digər qonaqlar Qarabağı ziyarət edirlər. Mən özüm də II Qarabağ müharibəsindən sonra beynəlxalq təşkilatın rəhbəri kimi, ölkəmizdə akkreditə olunmuş səfir və diplomatik korpusun təmsilçiləri ilə birlikdə Qarabağda dəfələrlə olmuşam. 30 illik işğalın ağır nəticələrini, xarabalığa çevrilmiş şəhər və kəndlərimizi, tarixi-mədəni irsimizə vurulmuş ziyanı gözlərimizlə görmüşük.
Bu fikirləri AZƏRTAC-a açıqlamasında Milli Məclisin Mədəniyyət komitəsinin sədr müavini Günay Əfəndiyeva bildirib.
O bildirib ki, bu illər ərzində Azərbaycandakı diplomatik korpusun nümayəndələrinin azad olunmuş torpaqlarımıza müntəzəm səfərləri dövlətimizin Qarabağda addım-addım həyata keçirdiyi quruculuq siyasətinin əyani şəkildə təqdim olunması baxımından mühüm əhəmiyyət daşıyır: “Bu gün Qarabağa və Şərqi Zəngəzura yenidən səfər edən heyət Azərbaycanın öz keçmişinə, çoxəsrlik irsinə yanaşmasının, dağıdılmış ərazilərimizin abadlaşdırılmasının, abidələrimizin bərpasının, yeni infrastrukturun inşasının şahidi olurlar. Ermənistanda sülh istəməyən qüvvələr səfərə qarşı artıq köhnəlmiş iddialarla çıxış edirlər. Qarabağ və Şərqi Zəngəzur Azərbaycanın tam suveren ərazisidir. Bu baxımdan, ölkəmizdə xarici diplomatik nümayəndələrin hərəkətini Ermənistanın daxili siyasi gündəliyinin bir hissəsinə çevirməsi cəhdləri qəbuledilməzdir.
Tarixi Gəncəsər və Xudavəng monastırlarındakı ermənilərin “qədim kitabları” kimi saxtalaşdırmaq olmaz. Gəncəsər və Xudavəng abidələri Azərbaycanın ərazisində əsrlərlə mövcud olmuş Qafqaz Albaniyasının tarixi-mədəni irsidir. Elə ermənilərin öz mənbələrində bunu təsdiq edən çoxsaylı tarixi sübutlar, faktlar var.
Ermənistanın ziddiyyətli yanaşmaları və addımları bölgədə formalaşan sülh mühitinə də mənfi təsir göstərir. Regionun gələcəyi əsassız ittihamlarla deyil, beynəlxalq hüquqla, suverenliyə, ərazi bütövlüyünə hörmət prinsipləri ilə qurulmalıdır”, - deyə o qeyd edib.
Bölmənin digər xəbərləri
