GÜRCÜ HƏRBÇİLƏRİN YENİ DƏSTƏSİ İRAQA YOLA DÜŞMÜŞDÜR
AZƏRTAC-ın xüsusi müxbiri xəbər verir ki, martın 1-də Gürcüstan Silahlı Qüvvələri birinci briqadasının 13-cü batalyonunun 600 nəfərədək hərbi qulluqçusu İraqa yola düşmüşdür. Onlar ABŞ-ın “Təlim və təchizat” proqramı çərçivəsində hazırlıq keçmişlər. Gürcüstan müdafiə nazirinin müavini David Sixarulidzenin sözlərinə görə, gürcü hərbçiləri İraqdakı koalisiya qüvvələri rəhbərlərinin tapşırığını yerinə yetirəcək, əsasən, BMT missiyasının obyektlərini qoruyacaq, qanunsuz silahların yığılmasında, cinayətkarların yaxalanmasında, qaçaqmalçılığa qarşı mübarizədə və digər sülhməramlı əməliyyatlarda iştirak edəcəklər.
Yolasalma mərasimində Gürcüstan Müdafiə Nazirliyi Baş qərargahının rəisi Levan Nikoleişvili və ABŞ-ın Gürcüstandakı səfiri vəzifəsinin icraçısı Patrislya Moller çıxış etmişlər.
Xatırladaq ki, yeni kontingentlə birlikdə, İraqdakı gürcü hərbçilərinin sayı 850 nəfərə çatmışdır.
İslam Əliyev
AZƏRTAC-ın xüsusi müxbiri
Tbilisi
