GÜRCÜSTAN APTEKLƏRİNƏ TƏHLÜKƏLİ DƏRMAN DAXİL OLMUŞDUR
AZƏRTAC-ın xüsusi müxbiri xəbər verir ki, Gürcüstan Səhiyyə və Sosial Müdafiə Nazirliyi Əczaçılıq Departamentinin rəhbəri Tina Turbeladze Gürcüstanın apteklər şəbəkəsinə İsveçrə əczaçılıq şirkətinin istehsal etdiyi 42,5 milliqram/millilitr həcmində 5 nömrəli, 486902 seriyalı “Solkoseril” məhlulu daxil olduğunu bildirmişdir. T.Turbeladzenin sözlərinə görə, həmin məhlul təhlükəlidir. İstehsalçı şirkətin verdiyi məlumata görə, preparatın istehsalının texnoloji rejimi pozulmuş, nəticədə “Solkoseril” üçün ampulalar səhvən “Aloferin” preparatı ilə doldurulmuşdur. “Aloferin”dən “Solkoseril” əvəzinə istifadə olunması təhlükəli nəticələr verə bilər. İlkin məlumata görə, preparat rəsmi surətdə Gürcüstana idxal olunmamışdır, ancaq onun qaçaqmalçılıq yolu ilə Ukraynadan gətirilməsi istisna olunmur.
Səhiyyə Nazirliyi səhiyyə müəssisələrindən istifadə və satış zamanı həmin dərmanın seriyasını yoxlamalarını tələb etmişdir.
Bölmənin digər xəbərləri
