GÜRCÜSTAN BTC-NİN TİKİNTİSİNDƏN ARTIQ BÖYÜK MƏNFƏƏT GÖTÜRMÜŞDÜR
Gürcüstan Prezidenti Eduard Şevardnadze bazar ertəsi ölkə radiosuna ənənəvi müsahibəsində bəyan etmişdir: Bakı-Tbilisi-Ceyhan neft kəmərinin Gürcüstan ərazisində tikintisinə cəmi iki ay əvvəl başlansa da, inşaat işləri ölkəyə artıq böyük mənfəət gətirmişdir. AZƏRTAC-ın müxbiri xəbər verir ki, Gürcüstan dövlətinin başçısı demişdir: Batumi və Poti limanları vasitəsilə 3,5 mindən çox boru və 300 vahiddən artıq lazımi avadanlıq daşınmışdır. Yüklərin gəmilərdən boşaldılıb qatarlara vurulmasına görə bu limanlar 4 milyondan çox lari (təxminən 2 milyon dollar), Gürcüstan dəmir yolu isə onların daşınmasına görə 3 milyon lari qazanmışdır. Bu bir yana, ərazisində neft kəmərinin tikintisi gedən 11 rayondan üçünün kəndlilərinə torpaq sahələrindən istifadəyə görə kompensasiya kimi 11 milyon ları verilmişdir və bütün bunlar işin yalnız başlanğıcıdır. Bundan əlavə, tikintinin sponsorları neft kəmərinin çəkilməsi ilə yanaşı, əyalətlərdə yolların, məktəblərin, tibb ocaqlarının təmir edlməsini, su təchizatı sisteminin qaydaya salınmasını da maliyyələşdirirlər.
Bölmənin digər xəbərləri
