Aslan Kərimov: Tacikistanla yoldaşlıq oyunu Millətlər Liqasına hazırlıq baxımından əhəmiyyətlidir
Bakı, 23 sentyabr, AZƏRTAC
Milli komandamızı qarşıda məsuliyyətli oyunlar gözləyir. Tacikistan millisi ilə yoldaşlıq matçı turnir baxımından heç nəyi həll etməsə də, strateji nöqteyi-nəzərdən əhəmiyyətlidir.
Bu sözləri AZƏRTAC-a açıqlamasında AFFA-nın Məşqçilərin maarifləndirmə şöbəsinin müdiri Aslan Kərimov milli komandanın Tacikistanla keçiriləcək yoldaşlıq görüşü və UEFA Millətlər Liqasındakı rəsmi oyunları haqda danışarkən deyib.
Mütəxəssis Litva və Lixtenşteyn komandalarına qarşı görüşlərin müəyyən hissələrində millimizin daha dominant oyun nümayiş etdirəcəyini proqnozlaşdırıb: "Litva millisi təxminən bizim səviyyədə olan bir komandadır. Heyətlərində Danimarkada və digər Avropa ölkələrində çıxış edən gənc oyunçuları çoxdur. Son matçda Gürcüstana 0:2 hesabı ilə məğlub olsalar da, həmin oyunda zaman-zaman dominantlıq edirdilər. Bizimlə oyunda da litvalılar bütün oyunboyu topa sahib olmayacaqlar. Onlar hücumameyilli oyunçularımızın sürətini və boşluqlar yarandığı halda bundan istifadə edə biləcəyimizi nəzərə alaraq, oyunun müəyyən hissələrində müdafiəyə çəkilmək məcburiyyətində qala bilərlər. Belə strategiyada bizə topa sahib olmaq və kombinasiyalı oyun lazım gələcək. Tacikistanla qarşılaşma bunun simulyasiyası ola bilər".
Aslan Kərimov yığmanın baş məşqçisi Ayxan Abbasovun Tacikistanla yoldaşlıq görüşündən maksimum yararlanacağını bildirib: "Hesab edirəm ki, Ayxan Abbasov bu oyunda düşündüyü taktiki gedişləri, əsas heyətə buraxmaqda tərəddüd etdiyi oyunçuları yoxlamaq və oyunun gedişatında dəyişikliklər etmək üçün yaxşı imkan qazanacaq. Tacikistanla oyun Litva ilə qarşılaşmanın hazırlığı baxımından bəzi açarları verə bilər".
Rəqiblərin durumunu dəyərləndirən Aslan Kərimov vurğulayıb ki, Litva zəif milli deyil və öz üstünlükləri var: "Onlar daha praqmatik oyun nümayiş etdirə və strukturlu müdafiə oluna bilərlər. Digər tərəfdən, heyətdəki oyunçuların Avropada çıxış etməsi də göstərir ki, rahat qələbə qazanacağımızı demək olmaz. Hər halda, komandamız meydana 3 xal üçün çıxacaq".
O, Lixtenşteynlə oyunun nəticəsinin qrupdakı ilk matçdan asılı olacağını qeyd edib: "Litva ilə oyunda qələbə qazanacağımız halda motivasiyamız daha yüksək olacaq və Lixtenşteynlə görüşdə çox çətinliklə üzləşməyəcəyik. Amma xal itkisinə məruz qalsaq, qısa zaman kəsiyində milli komandanın oyunçularını bərpa etmək və yenidən motivasiya vermək baş məşqçi üçün bir qədər çətinləşəcək. Ümumilikdə ümid edirəm ki, bu oyunlarda yaxşı nəticə göstərə biləcəyik".
Qeyd edək ki, bu gün “Palms Sports Arena”da təşkil olunacaq Azərbaycan – Tacikistan oyunu saat 20:00-da başlayacaq. Yığma bu matçdan sonra UEFA Millətlər Liqasında Litva ilə evdə və səfərdə (27 sentyabr, 4 oktyabr), eləcə də Lixtenşteynlə Bakıda (1 oktyabr) üz-üzə gələcək.
Bölmənin digər xəbərləri
