GÜRCÜSTAN PREZİDENTİ BİR ÇOX PROBLEMLƏRİN HƏLLİNDƏ QAZAXISTANA BÖYÜK ÜMİDLƏR BƏSLƏYİR

04.10.2005 [16:14]
Çap et
A⁺ A^-

AZƏRTAC-ın xüsusi müxbiri xəbər verir ki, Qazaxıstan Prezidenti Nursultan Nazarbayevin Gürcüstana səfərinin ikinci günü parlamentin binasında həmkarı Mixail Saakaşvili ilə təkbətək görüşlə başlamış, iki ölkənin nümayəndə heyətlərinin geniş tərkibdə görüşü ilə davam etmişdir.

Sonra prezidentlər birgə mətbuat konfransı keçirmişlər. M.Saakaşvili MDB məkanında Gürcüstanın Qazaxıstanla da münasibətlərə üstünlük verdiyini, Qazaxıstanın heç kəs üçün problem yaratmadığını, əksinə, mövcud problemlərin həllinə çalışdığını, öz ölkəsinin bir çox problemlərinin nizama salınmasında bu Orta Asiya dövlətinə böyük ümid bəslədiyini bildirmişdir. O demişdir ki, Qazaxıstan qazının Gürcüstana çox yaxşı və qarşılıqlı surətdə sərfəli şərtlərlə ixracı barədə razılaşma əldə edilmişdir.

N.Nazarbayev nəqliyyat, energetika və s. sahələrdə Qazaxıstan-Gürcüstan münasibətlərindən, Qazaxıstanın enerji daşıyıcılarının Azərbaycan vasitəsilə Gürcüstan ərazisinə və buradan da digər ölkələrə nəql olunması perspektivlərindən danışmışdır.

Oktyabrın 3-də ali qonaq Gürcüstan parlamentinin sədri Nino Burcanadze ilə görüşmüşdür.

Həmin gün hökumətlərarası dörd memorandum imzalanmışdır.

Qazaxıstan Prezidentinin Gürcüstana səfəri oktyabrın 4-də başa çatmışdır.