Gürcüstanda beynəlxalq avtomobil magistralının Rikoti aşırımı hissəsi istifadəyə verilib
Tbilisi, 30 oktyabr, AZƏRTAC
Gürcüstanda beynəlxalq əhəmiyyətli avtomobil magistralının (E60) tərkib hissəsi olan Rikoti aşırımının və tunelinin açılışı olub.
AZƏRTAC xəbər verir ki, bu yol həm də Gürcüstanın Şərqi ilə Qərbini birləşdirir.
Gürcüstan Regional İnkişaf və İnfrastruktur Nazirliyinin məlumatına görə, magistralın 27 kilometrlik yeni dördzolaqlı hissəsi Xaraqauli bələdiyyəsinin Xevi kəndi yaxınlığından başlayır və Zestafoni bələdiyyəsinin Şorapani qəsəbəsində bitir. Yolun həmin hissəsinə 65 körpü və 38 tunel daxildir. Yeni layihə əvvəlki yolla müqayisədə gediş müddətini 25 dəqiqə azaldır.
Bundan əlavə, Gürcüstanın ən uzun körpüsü və ən uzun tuneli magistralın Xevi-Şorapani hissəsində inşa olunub. Körpünün uzunluğu 1362 metr, tunelin uzunluğu isə 1640 metrdir. Rikoti layihəsi çərçivəsində ümumilikdə 51 tunel və 97 körpü tikilir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
