Gürcüstanın Baş naziri vəzifəsini DİN rəhbəri tutacaqdır

02.11.2013 [18:25]
Çap et
A⁺ A^-

Tbilisi, 2 noyabr (AZƏRTAC). Gürcüstanın Baş naziri Bidzina İvanişvili “Gürcü arzusu” koalisiyası Siyasi Şurasının və parlament əksəriyyətinin üzvləri ilə məsləhətləşmədən sonra onu bu vəzifədə daxili işlər naziri İrakli Qaribaşvilinin əvəz edəcəyini bildirmişdir.

İ.Qaribaşvilinin namizədliyini Siyasi Şuranın və parlament əksəriyyətinin üzvləri yekdilliklə dəstəkləmişlər.

İrakli Qaribaşvili dəstəyə görə onlara təşəkkürünü bildirmiş və hökumətdə əsaslı dəyişiklik edilməyəcəyini qeyd etmişdir.

İ.Qaribaşvili 31 yaşındadır, 4 xarici dil bilir, İ.Cavaxişvili adına Tbilisi Dövlət Universitetini bitirmişdir, ailəlidir, 2 uşaq atasıdır.

Yeni seçilmiş Gürcüstan prezidentinin noyabrın 17-də keçiriləcək inaqurasiyasından sonra hökumət istefaya gedəcək və yeni Baş nazir öz proqramı ilə birlikdə hökumətin yeni tərkibini parlamentin təsdiqinə verəcəkdir.

B.İvanişvili Baş nazir vəzifəsinə namizədi hökumətin ən fəal üzvü adlandırmış və bu vəzifənin öhdəsindən layiqincə gələcəyinə əmin olduğunu bildirmişdir.

İ.Qaribaşvili yeni daxili işlər naziri vəzifəsində əvəzedicisini müəyyən məsləhətləşmələrdən sonra bəyan edəcəyini qeyd etmişdir.

İslam Əliyev

AZƏRTAC-ın xüsusi müxbiri

Tbilisi