Gürcüstanın Təhsil, Elm və Gənclər Nazirliyi Salome Zurabişvilinin açıqlamasını yalan adlandırıb
Tbilisi, 14 oktyabr, AZƏRTAC
Gürcüstanın Təhsil, Elm və Gənclər Nazirliyi Prezident Salome Zurabişvilinin məktəblərdə uşaqların şəxsi məlumatlarının xüsusi məqsədlər üçün toplanması ilə bağlı yaydığı məlumatı təkzib edir.
AZƏRTAC xəbər verir ki, bu barədə nazirliyin yaydığı bəyanatda bildirilib. Qeyd olunur ki, Prezidentin bu dezinformasiyası təhsil sisteminin nüfuzdan salınmasına xidmət edir. Gürcüstanın Təhsil, Elm və Gənclər Nazirliyi bildirir ki, Salome Zurabişvilinin məktəblərdə uşaqların şəxsi məlumatlarının toplanması ilə bağlı yaydığı məlumat yalandır və həqiqətə uyğun deyil. Bu cür dezinformasiyanın yayılması məqsədyönlü hərəkətdir və yalnız təhsil sisteminin nüfuzunu gözdən salmağa xidmət edir. “Şəxsi məlumatların toplanması, saxlanılması, işlənməsi, təhlili və idarə olunması “Şəxsi məlumatların qorunması haqqında” Gürcüstan Qanununa uyğun şəkildə Təhsil, Elm və Gənclər Nazirliyinin məlumat sistemi tərəfindən təmin edilir. Bu məlumat sistemi qanuni olaraq nazirliyin səlahiyyətində olan digər dövlət orqanlarının məlumat bazalarında olan şəxsi məlumatları toplamaq və istifadə etmək səlahiyyətinə malikdir. Konkret şəxsləri dezinformasiyanın yayılmasından çəkinməyə çağırırıq, çünki bu, məqsədli şəkildə ictimaiyyəti çaşdırmağa xidmət edir”, - deyə bəyanatda bildirilir.
Məlumat üçün bildirək ki, Salome Zurabişvili feysbuk səhifəsindəki paylaşımında məktəblərdə uşaqlardan valideynlərinin şəxsi nömrələrinin tələb olunduğunu qeyd edib.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
