HƏMAS və İsrail arasında atəşkəs rejimi sabah qüvvəyə minə bilər
Bakı, 23 noyabr, AZƏRTAC
HƏMAS hərəkatı ilə İsrailin razılaşdığı humanitar atəşkəs rejimi planlaşdırıldığı tarixdən bir gün sonra - noyabrın 24-də qüvvəyə minə bilər.
AZƏRTAC Qahirə mediasına istinadla xəbər verir ki, tərəflər arasında humanitar atəşkəsin başlama vaxtı ilə bağlı məlumatlar təzadlıdır. Danışıqlarda vasitəçilərdən biri olan Qətərin Xarici İşlər Nazirliyi dünəndən etibarən atəşkəs rejiminin “yaxın saatlarda” elan ediləcəyini bildirir.
Al Hadath telekanalının məlumatına əsasən, atəşkəsin elan olunması hər iki tərəfdən azad ediləcək girovların siyahısında yer alan şəxslərin məlumatlarının nəzərdən keçirilməsi və onların qarşı tərəflərə təhvil verilməsi sxeminin dəqiqləşdirilməsi ilə bağlıdır.
Qeyd edək ki, razılaşmaya əsasən HƏMAS hərəkatının 50 girovu azad etməsi müqabilində 150-yə yaxın fələstinli uşaq və qadın İsrail həbsxanalarından buraxılacaq, 4 günlük atəşkəs rejimi elan olunacaq və Qəzza sektoruna yanacaq tədarükünə imkan veriləcək. İsrail hakimiyyət orqanlarının məlumatına əsasən, hazırda HƏMAS hərəkatının əlində 200-dən çox girov var.
İsrail hökuməti noyabrın 22-nə keçən gecə xüsusi iclasdan sonra ən azı 50 girovun dörd gün ərzində Qəzza sektorundan qaytarılması, əlavə olaraq azad ediləcək hər 10 girov müqabilində atəşkəsin bir gün uzadılması, bundan sonra isə Fələstin eksklavında hərbi əməliyyatların bərpa olunması barədə planı təsdiqləyib.
Bölmənin digər xəbərləri
