Hər gün 500 milyondan çox insan “Facebook”a mobil qurğularla daxil olur
Bakı, 31 oktyabr (AZƏRTAC). “Facebook” sosial şəbəkəsinin mobil auditoriyasının sayı saytın ümumi istifadəçilərinin sayına yaxınlaşmaqda davam edir.
Belə ki, son məlumatlara görə, sosial şəbəkənin mobil xidmətlərindən hər ay orta hesabla 874 milyon insan istifadə edir ki, bu da bir il əvvəl qeydə alınan nəticədən 45 faiz çoxdur. “Facebook” onu da bəyan etmişdir ki, hazırda mobil reklamın şirkətin ümumi reklam mədaxilində payı təxminən 49 faiz təşkil edir.
Sentyabrın sonuna olan məlumata görə, şəbəkənin aylıq aktiv istifadəçilərinin sayı ümumilikdə 1,19 milyardı ötmüşdür. Bununla yanaşı, cari ilin üçüncü rübü ərzində saytın auditoriyası 400 milyon nəfər artmışdır. Hər gün “Facebook” şirkətindən təqribən 728 milyon nəfər istifadə edir ki, bu da ötən ilin göstəricisindən 25 faiz çoxdur.
Qeyd edək ki, mobil texnologiyalar “Facebook”un biznesinin inkişafı üçün prinsipial əhəmiyyət kəsb edir. Məhz sosial şəbəkə mobil reklam göstəricilərinin artmasını açıqlayandan sonra şirkətin səhmlərinin dəyəri yüksəlməyə başlamışdır.
Bölmənin digər xəbərləri
