Hərbçilər arasında güləş üzrə dünya çempionunun məşqçisi: İdmançılarımız tarix yazdılar
Bakı, 30 noyabr, AZƏRTAC
“Hərbçilər arasında keçirilən güləş üzrə 36-cı dünya çempionatında idmançılarımız qazandığı uğurlarla, sözün əsl mənasında, tarix yazdılar. Bu uğurlar sayəsində belə mötəbər turniri 6 medalla - 4 qızıl, 1 gümüş və 1 bürünc mükafatla başa vurduq. Bu uğurların əldə olunmasında ən böyük pay sahibi güləşçilərimiz idi. Belə mötəbər yarışlarda qələbə qazanmaq, nəticə vermək çox əhəmiyyətlidir. Həmin qaliblərdən biri də mənim tələbəm Əli Rəhimzadədir”.
Bu barədə AZƏRTAC-a müsahibəsində hərbçilər arasında güləş üzrə 36-cı dünya çempionatında 65 kiloqram çəki dərəcəsində finala çıxaraq qızıl medala sahib olan Əli Rəhimzadənin müəllimi və məşqçisi İlham Mustafayev bildirib.
O qeyd edib ki, idmançı Əli Rəhimzadə həmin yarışa Azərbaycan dövlətini, bayrağını, ordusunu və xalqını layiqincə təmsil etmək üçün çox ciddi hazırlaşırdı:
“Bu, onun vətəndaş məsuliyyəti, qərarı və özünə mənəvi tapşırığı idi. O, finalda rəqibinə qalib gələrək azarkeşlərə böyük sevinc, qürur və fəxr hissi bəxş etdi.
Bu, bir məşqçi kimi mənim də, yığma komandanın da məsuliyyətini artırdı. Azərbaycanın dövlət bayrağı hər bir sahədə daim zirvələrdə dalğalanacaq”.
Bölmənin digər xəbərləri
