HƏRBİ LİTSEYİN MƏZUNU, MİLLİ QƏHRƏMAN, KORPUS KOMANDİRİ, GENERAL-LEYTENANT RÖVŞƏN ƏKBƏROVUN ÇIXIŞI
-Zati-aliləri cənab Ali Baş Komandan!
Xanımlar və cənablar!
Mənim üçün müstəqil respublikamızın Milli Ordusunun yaranma tarixi 1971-ci ildən başlanır. Məhz həmin ildə təməli qoyulmuş Cəmşid Naxçıvanski adına hərbi litsey müstəqilliyimizin gerçəkləşməsi yolunda atılmış uğurlu bir addım hesab oluna bilər.
Bu hərbi məktəb həmişə cənab Heydər Əliyevin diqqət mərkəzində olmuşdur. Respublikamıza gələn ən mötəbər qonaqlar buranı ziyarət edirdilər. O, cənab Heydər Əliyevin sayəsində keçmiş SSRİ-də nümunəvi bir məktəbə çevrilmişdir.
1981-ci ildə məktəbimizin yaradılmasının 10 illik yubileyi təntənələrində iştirak etmək üçün SSRİ-nin bir çox ali hərbi məktəblərinin rəhbərləri Bakıya gəlmişdilər. Onlar Naxçıvanski adına məktəbdə təlim-tərbiyə prosesi, maddi-texniki baza, onun proqramları ilə tanış olduqdan sonra öz heyranlıqlarını gizlətmirdilər. Cənab Heydər Əliyevin yubiley nitqindən sonra Simferopol Ali Hərbi Məktəbinin rəisi çıxışında qeyd etdi ki, Naxçıvanski adına məktəbin məzunlarının hazırlıq səviyyəsi o qədər yüksəkdir ki, onları ali hərbi məktəblərə imtahansız qəbul etmək olar. Digər hərbi məktəblərin rəhbərləri də onun bu fikrini dəstəklədilər. Elə həmin il mən - Cəmşid Naxçıvanski adına məktəbin məzunu Kiyevdə Ali Hərbi Ümumqoşun Komandanlıq Məktəbinə daxil olarkən orada bizə bu gözəl münasibətin canlı şahidi oldum.
Yeri gəlmişkən, həyatımın Kiyev dövrü ilə bağlı bir məqamını da yada salmaq istəyirəm. Cənab Ali Baş Komandan, bu, Siz Moskvaya getdikdən sonra da Naxçıvanski adına məktəbin məzunlarına göstərdiyiniz qayğı və köməyi nümayiş etdirmək üçün çox səciyyəvidir. 1984-cü ildə Kiyev Hərbi Dairəsi Hərbi Şurasının üzvü və təhsil aldığım ali hərbi məktəbin rəisi məni yanına çağıraraq dedi ki, Naxçıvanski adına məktəbin bizim ali məktəbə daxil olmaq istəyən bir məzunu tibbi komissiyadan keçməmiş və buna görə də hansısa başqa bir mülki ali məktəbə daxil olmuşdur. Sən həmin azərbaycanlını təcili tapıb buraya gətirməlisən və biz onu kursantlar sırasına daxil etməliyik. Məlum oldu ki, onun atası cənab Heydər Əliyevə məktub göndərərək, tibbi komissiyanın onun oğluna qeyri-obyektiv münasibət bəslədiyini bildirib və sual edib ki, cəmi bir neçə ay bundan əvvəl Naxçıvanski adına məktəbi sağlam vəziyyətdə bitirən oğlunun səhhəti ilə bağlı hansı problemi ola bilər? Məktəbin rəisi xüsusi olaraq vurğuladı ki, bu məsələni bir gün ərzində həll edib, SSRİ müdafiə nazirinə məruzə etməliyik, çünki məsələ Heydər Əliyevin şəxsi nəzarətindədir.
Həmin gənci biz tapdıq və tədris ilinin başlanmasından iki ay keçməsinə baxmayaraq, o, elə həmin gün ali hərbi məktəbə qəbul olundu.
Möhtərəm Prezident, cənab Ali Baş Komandan!
Naxçıvanski adına məktəbin məzunlarına Sizin diqqət və qayğınızın həmişə şahidi olmuşam. Biz həmin məktəbin məzunları olduğumuza görə fəxr etdiyimiz kimi, Siz də məktəbin yetirmələrini gördükcə sevinirdiniz. Yadımdadır, 1992-ci ildə erməni işğalçıların Naxçıvana hücumları başlayanda, biz bir taburla Sədərəkə göndərilmişdik. Siz Sədərəkə - cəbhə bölgəsinə gələrək, bizimlə görüşdünüz. Taburumuzun zabitlərinin əksəriyyətinin Naxçıvanski adına məktəbin yetirmələri olduğunu öyrəndikdə necə sevindiyiniz indi də xatirimdədir. Bir il sonra - 1993-cü il dekabrın 17-də biz Sizinlə gərgin döyüş şəraitində, Füzulidə ön səngərdə görüşdük. Orada da Naxçıvanski adına məktəbin məzunlarını görərkən sevincinizin həddi-hüdudu yox idi. Bizimlə səmimi söhbət etdiniz, dəyərli tövsiyələr verdiniz, döyüşçülərə hədiyyə olaraq saat bağışladınız. Sizinlə görüş bizdə elə bir ruh yüksəkliyi yaratdı ki, elə həmin günlərdə üzərində “Vətən uğrunda!”, “Heydər Əliyev uğrunda!” sözləri yazılmış tanklarla hücuma keçərək, işğal olunmuş 45 kilometrlik ərazini azad etdik və həmin ərazi bu gün də qorunub saxlanılır. Bu 45 kilometrlik ərazinin hər qarışının azad olunmasında Sizin öyüd-nəsihətinizin xüsusi payı vardır.
Aprelin 19-da hərbi litseydə keçirilən yubiley tədbirində mən də iştirak edirdim. İstər-istəməz kursantlıq dövrümü xatırlayıb görürdüm ki, hərbi litsey nə dərəcədə müasirləşib, gözəlləşib və kursantların hazırlıq səviyyəsi necə artıbdır. Həmin anlarda Sizin necə fərəh hissi keçirdiyinizi görürdük. Fəxr edirdik ki, 30 illik yubileyi də məhz cənab Heydər Əliyevin rəhbərliyi altında keçiririk.
Hazırda müasir standartlara cavab verə bilən yeni təhsil sisteminə keçmiş hərbi litseyimiz vardır. Son illərdə burada aparılan tikinti-quruculuq, əsaslı təmir işləri, yeni müasir avadanlığın, tədris ləvazimatının alınması, təlim-tərbiyə, bədən tərbiyəsi və idmanın inkişafı üçün möhkəm maddi-texniki bazanın yaradılması yalnız hörmətli Prezidentimizin bu məktəbə göstərdiyi qayğı sayəsində mümkün olmuşdur.
Mən çıxışımı möhtərəm Prezidentimizin bir kəlamı ilə bitirmək istəyirəm: “Biz bu işi başlayanda, o, bizim üçün nəzəriyyə deyildi, böyük gələcəyə baxış idi. Azərbaycanın gələcəyinə baxış idi. Azərbaycanda milli zabit kadrlarının hazırlanması üçün ilk addımlar idi. Biz bu addımları atarkən düşünürdük ki, zaman gələcək, Azərbaycan xalqı öz milli azadlığını əldə edəcək. Dövlət müstəqilliyini əldə edəcək, müstəqil Azərbaycan dövləti yaranacaqdır. Artıq zaman gəlmişdir, Azərbaycan xalqı öz milli azadlığını əldə edib, dövlət müstəqilliyimiz əldə olunubdur. Müstəqil Azərbaycan dövləti yaranmışdır”. Cənab Ali Baş Komandan, bütün bunlara görə Sizə minnətdarıq.
Diqqətinizə görə çox sağ olun.
Bölmənin digər xəbərləri
