HİMALAY DAĞLARINDA 20 İL BUNDAN ƏVVƏL YOXA ÇIXMIŞ TURİSTLƏRİN CƏSƏDLƏRİ TAPILMIŞDIR
Qəzet yazır ki, sentyabrın 14-də Kanq La Dzanskara buzlağında 1982-ci ildən itkin düşmüş hesab olunan ən azı üç turistin cəsədləri aşkar edilmişdir. Bir qrup ispaniyalı alpinist bir ay bundan əvvəl təsadüfən həmin faciənin baş verdiyi yerə gəlib çıxmışdır.
Həlak olanlardan iki nəfərinin şəxsiyyəti artıq müəyyən edilmişdir. Üstlərində tapılmış sənədlərə görə, onlar İsveç vətəndaşı 19 yaşlı Litiya Marqot və ABŞ vətəndaşı Viktor Dzendir. İsveçin və ABŞ-ın Nyu-Dehlidəki səfirliklərində həmin adamların, həqiqətən, itkin düşənlərin siyahısında olması barədə məlumatı təsdiq etmişlər.
Bu, Himalay dağlarında çoxdan yoxa çıxmış insanların təsadüfən aşkar olunması ilə bağlı heç də ilk hadisə deyildir. Ötən il bir qrup alpinist təxminən həmin bölgədə, lakin digər buzlaqda 1968-ci ildə təyyarə qəzası nəticəsində həlak olmuş iki hind əsgərinin cəsədlərinin qalıqlarını aşkar etmişdi. Həlak olmuş əsgərlərin cəsədləri 35 ildən sonra Kəşmirdəki qohumlarına qaytarılmışdı.
