Hindistanda “Biparcoy” fırtınası ilə əlaqədar xəbərdarlıq edilib
Pekin, 13 iyun, AZƏRTAC
Hindistanın meteorologiya departamenti ölkənin qərbindəki Qucarat ştatının sahilboyu yaşayış məntəqələrində “Biparcoy” fırtınası ilə əlaqədar xəbərdarlıq elan edib.
AZƏRTAC xəbər verir ki, Ərəb dənizindən saatda 7 kilometr sürətlə Qucarat ştatına çatan qasırğanın iyunun 15-dək ciddi fəsadların törədə biləcəyi, tikililəri dağıdacağı, kommunikasiya xətlərinə ziyan vuracağı proqnozlaşdırılıb. Küləyin sürətinin saatda 150 kilometrə çatacağı bildirilir. Ehtimal olunan təbii fəlakətlə mübarizə üçün müvafiq qurumlara tapşırıqlar verilib. Fırtınanın gətirəcəyi şiddətli yağışların sel və daşqınlara səbəb olacağı, əkin sahələrinə və meyvə bağlarına ciddi ziyan dəyəcəyi güman edilir.
“Biparcoy” ilə əlaqədar bölgədə balıqçılara növbəti 5 gün ərzində dənizə çıxmamaq tövsiyə olunub. Fırtına səbəbindən iyunun 14-nə “narıncı”, iyunun 15-nə isə “qırmızı” xəbərdarlıq elan edilib.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
