Hindistanın cənubunda baş verən iğtişaşlar nəticəsində iki nəfər həlak olub
Bakı, 12 avqust, AZƏRTAC
Hindistanın cənubunda yerləşən Karnataka ştatının paytaxtı Banqalor şəhərində baş verən kütləvi iğtişaşlar nəticəsində ən azı iki nəfər həlak olub, onlarla insan yaralanıb.
AZƏRTAC “The Times of India” qəzetinə istinadla xəbər verir ki, hadisəyə yerli siyasətçilərdən birinin qohumları tərəfindən sosial şəbəkədə yerləşdirilən və müsəlmanların dini hisslərini təhqir edən yazı səbəb olub.
Siyasətçinin həbsini tələb edən etirazçılar onun evinə hücum ediblər. Onlar evi qoruyan polisə daş və yandırıcı maddə dolu şüşələr atıb, həmçinin bir neçə polis maşınını yandırıblar. Polis isə öz növbəsində aksiya iştirakçılarına qarşı gözyaşardıcı qazdan istifadə edib və havaya atəş açıb.
İğtişaşlar nəticəsində, həmçinin 60-a yaxın polis əməkdaşının xəsarət aldığı bildirilir. Toqquşmaların qeydə alındığı ərazidə zonada komendant saatı tətbiq edilib.
Bölmənin digər xəbərləri
