İlyas Mirzəyev: Ümidvaram ki, əsərlərim azad olunmuş Qarabağda tezliklə ifa ediləcək
Ankara, 11 may, AZƏRTAC
Səmimi-qəlbdən ümid edirəm ki, Azərbaycanın Qarabağ bölgəsinə həsr olunmuş balaban konserti tezliklə doğma yurdumuzun azad edilmiş torpaqlarında təqdim olunacaq.
Artıq 30 ildən çoxdur qardaş Türkiyədə yaşayan və Ankara Musiqi və Təsviri Sənət Universitetində dərs deyən tanınmış Azərbaycan bəstəkarı və pianoçusu İlyas Mirzəyev bu sözləri AZƏRTAC-a müsahibəsində deyib.
Altı simfoniyanın, 13 konsertin və onlarla digər əsərin müəllifi olan bəstəkar bildirib ki, doğma torpağına olan sevgisini not yazılarında çatdırmaq və tarixi ədalətin tezliklə bərpa olunacağına inamını gücləndirmək üçün 2016-cı ildə Qarabağ mövzusunda bir əsər yazmaq qərarına gəlib.
Mayın 11-də 65 yaşını qeyd edən bəstəkar əlavə edib: “Bu gün hər bir azərbaycanlı kimi, mən də Vətənin ərazi bütövlüyünün və suverenliyinin bərpasından səadət və qürur hissi keçirirəm Buna görə Prezident, Ali Baş Komandan İlham Əliyevə minnətdaram. Ümid edirəm ki, son illərdə dünyanın müxtəlif səhnələrində ifa olunan balaban konserti ölkəmizin Qarabağ bölgəsindəki musiqi tədbirlərindən birinin repertuarına daxil ediləcək”.
İ. Mirzəyev xatırladıb ki, bu konsert əvvəllər Bakıda Üzeyir Hacıbəyli adına Azərbaycan Dövlət Simfonik Orkestrinin iştirakı ilə keçirilən “Qarabağ inciləri” xeyriyyə proqramı çərçivəsində ifa olunub və əldə olunan bütün gəlir şəhid və qazi ailələrinə bağışlanıb.
Pianoçu bildirib ki, Azərbaycan musiqi məktəbi dünyanın ən yaxşılarından biridir. “Azərbaycanın peşəkar musiqi sənəti Üzeyir Hacıbəyli, Qara Qarayev, Fikrət Əmirov, Cövdət Hacıyev və başqa əfsanəvi şəxsiyyətlərlə bağlıdır. Bu gün gənc nəsil Azərbaycan vətəndaşları arasında bir çox istedadlı musiqiçinin yetişdiyini görməkdən məmnunam. Onlardan bəziləri təhsillərini Türkiyədə davam etdirirlər”, - deyə əsərləri Tokio, Berlin, Barselona, London, Vyana, Moskva, Paris, Köln, Budapeşt, Brüssel, Ankara, İstanbul və digər yerlərdə ifa olunan bəstəkar vurğulayıb.
İ. Mirzəyev İstanbula simfoniya həsr edən azsaylı bəstəkarlardan biridir.
Məşhur “Arşın mal alan” əsərinin aranjemanı məhz Türkiyə metropolunda ifa olunub.
“Atam Sovet İttifaqında geniş tanınan görkəmli bəstəkar Musa Mirzəyevdir. Anam, jurnalist Svetlana Mirzəyeva Ümummilli Lider Heydər Əliyevlə dostluğu ilə daim fəxr edirdi. O, bütün ömrü boyu “Bakinski raboçi” qəzetində işləyib”, - deyə bəstəkar qeyd edir. O, S. Mirzəyevanın müasir Azərbaycan dövlətçiliyinin memarı ilə çəkdirdiyi fotoşəkildən, eləcə də ailə arxivində saxlanılan Heydər Əliyevə həsr olunmuş kitabdan bəhs edir.
Soydaşımız bəstəkarlıq üzrə ilk müəlliminin Bülbül məktəbinin əfsanəvi direktoru Nazim Əliverdibəyov olduğunu bildirir. “O, məni böyük Üzeyir Hacıbəylinin göstərdiyi doğru yola yönəltməyi bacarıb. Həmçinin evində və məşqlərdə tez-tez görüşdüyüm görkəmli musiqiçi Vaqif Mustafazadə ilə əlaqələrimi unudulmaz hesab edirəm. Məktəbi bitirənə qədər artıq bir neçə əsər yazmışdım", - deyən musiqiçi sonralar Rafiq Babayevin orkestrində çalışdığını da qeyd edib.
Bəstəkar Türkiyədə yaşadığı illərdə Tekfen Filarmoniya Orkestri ilə əməkdaşlıq edib və hazırda qardaş ölkədə yeni nəsil musiqiçilərin yetişməsinə töhfə verir.
İ. Mirzəyev caz və pop musiqisi həvəskarları arasında da populyardır. O, 1985-ci ildə özünün ilk caz ansamblını yaradıb və sonradan “Blue, Red, Green” (Azərbaycan bayrağının rəngləri - red.) adlı caz albomunu buraxıb.
İllər ərzində Nilüfer, Candan Erçetin, Fatih Erkoç, Sezen Aksu, Sertap Erener və başqa tanınmış türk pop müğənniləri onun xidmətlərindən yararlanıblar.
Yarıməsrlik yaradıcılıq fəaliyyətindən sonra bəstəkar təhsilini İstanbul Universitetində doktoranturada davam etdirir.
Bölmənin digər xəbərləri
